Read Ntcham Psaumes 115 Bible Online

Psaumes 115 - Ntcham bible

Psaumes 115

¹An kaa sá kí tīī timbi, ti-Dindaan, an kaa sá kí tīī timbi, ama a-yindi ní á tīī tinyool a-neeŋkpaandi nì a-baamɔŋyi pu.

²Ba pu ní atimbun lì yii: «Bi-Nimbɔtiuee bí la ní?»

³Ti-Nimbɔtiu bí yilpu ní, u yaa là puee, míǹ ní u ŋáań.

⁴Animbil kúti nì sindaariya ní bi dūu mɔ́ɔ́ bi-waaŋi, unil di dū u-ŋalii ki mɔ́ɔ́-ŋi.

⁵Ŋi cáá kinyɔkɔ ní kaa sòoǹ, ŋi cáá animbil ní kaa wāĺ.

⁶Ŋi cáá atafal ní kaa gbìl̀, ŋi cáá dimaŋfal ní kaa gbìl̀ nsɔnsɔfi àá nnunnu.

⁷Ŋi cáá iŋal ní kaa ŋūǹ kí gbēē tiwan, ŋi cáá ataa ní kaa ŋūǹ kí còom̀. Ŋaa ŋūǹ kí nyāntí tibɔti ŋi-neeŋyin.

⁸Bin mɔ́ɔ́-ŋee ń nīn bí kii ŋi nín bí puee, ki kpáaǹ bin kɔkɔ máká ŋi-puee[207].

⁹- Nimbi Isirayeel yab, nín̄ mákámaan ti-Dindaan pu. - Úǹ di sá bi-jòońliu nì bi-gbampɔɔl.

¹⁰- Aarɔn naantiibi, nín̄ mákámaan ti-Dindaan pu. - Úǹ di sá bi-jòońliu nì bi-gbampɔɔl.

¹¹- Nimbi bin fàŋkí ti-Dindaanee, nín̄ mákámaan ti-Dindaan pu. - Úǹ di sá bi-jòońliu nì bi-gbampɔɔl.

¹²- Ti-Dindaan téetí ti-pu, u làá bìin̄ ti-pu. - U làá bìin̄ Isirayeel yab boon, - u làá bìin̄ Aarɔn naantiibi boon.

¹³U làá bìin̄ bin fàŋkí ti-Dindaanee boon, mbiyaamu nì bikpaambi kɔkɔ[208].

¹⁴- Ti-Dindaan ń yàntī ní bùtī, ni nì ni-biyaamu!

¹⁵Ti-Dindaan ń bìin̄ ni-boon, úǹ un di náań yilpu nì taapuee!

¹⁶Ti-Dindaan di yì yilpu, ama ní ki dū kitiŋ ki tīī binib.

¹⁷An kaa sá bitaŋkpiibi di nyɔ́ŋkí ti-Dindaan, kaa tí sá bin kɔkɔ sìntī diŋmiŋŋmidikil tiŋkinee.

¹⁸Ama timbee, ti làá jāam̀ ti-Dindaan, kí yòon̄ kɔŋkɔnnee kí nīn cáa cá jaanjaan! Aleeluya, nyɔ̄ŋkìmaan ti-Dindaan!