Read Ntcham Psaumes 116 Bible Online

Psaumes 116 - Ntcham bible

Psaumes 116

¹M néeń ti-Dindaan, di sá yii u pílifì m-gbaamii.

²U kpōoǹ u-tafal ki túĺ m-watil pú. M-maŋfal wiiŋyi kɔkɔ poonee, m làá nīn kūuntí ki yíì-u.

³Ŋkúm kusakai nìn fìn̄-mi, ditaŋkpiilin laaŋku nìn sàl̄-mi. M nìn bí dinimbinaamandi nì kunimbaaun.

⁴Niinee ní m kúuǹ ki yíiń ti-Dindaan yindi yii: «M-Dindaan, m gbàam̄-si, fīī-mi!»

⁵Ti-Dindaan sá usaasɔl ní ki bí deedee, ti-Nimbɔtiu poon mɔ̄.

⁶Ti-Dindaan wúǹ ŋwɔsɔfimu pu, m nìn pēefì tikpil ní ti-Dindaan fīī-mi.

⁷M làá fàtīí ká m-ŋuŋfil, di sá yii ti-Dindaan ŋá-mi tiŋan.

⁸Tiŋman, a fīī-mi ki nyántì ŋkúm ŋaan, a pítì m-nyinnyim, kaa yāntì m lítì.

⁹M làá nīn còom̄ sii ti-Dindaan nimbiin, binifoobi tiŋki nee poon.

¹⁰M nìn gbíntìi cáá fookii min kamaa m nìn bí ki lì yii[209]: «M gbí isaa tikpilee!»

¹¹M-pɔbil nìn bíil̀ ní m nìn lì yii: «Binib kɔkɔ sá binyimɔndambi[210]!»

¹²Mana ní m làá ŋmā kí téeǹ ti-Dindaan tiŋan tin kɔkɔ u ŋá-mee?

¹³M làá yòon̄ difiil kɔŋkɔnnyɔkaau yilpu ní kí yíiń ti-Dindaan yindi.

¹⁴M làá pà ti-Dindaan m-pooŋyi pɔndi u-nibul kɔkɔ nimbiin.

¹⁵Bin yú nì ti-Dindaan deedeeyee kúm cáá kunyampoou u-nimbiin.

¹⁶Áù ti-Dindaan, m sá a-tɔntɔnliu ní, m lafun sá a-tɔntɔnliu, a-tɔntɔnliu unimpu jipɔɔn! A cúú m-kusakai ki bútì.

¹⁷M làá ŋá ijaam saraau kí tīī-si, ní kí yíiń sii ti-Dindaan yindi.

¹⁸M làá pà ti-Dindaan m-pooŋyi pɔndi u-nibul kɔkɔ nimbiin,

¹⁹u-diiku cindin, sii Jeerusaleem tiŋki kansikin. Aleeluya, nyɔ̄ŋkìmaan ti-Dindaan!