Read Ntcham Psaumes 119 Bible Online

Psaumes 119 - Ntcham bible

Psaumes 119

¹Unil un baa kāntí tikpitil tiba u-saŋkindi poon, ní u ŋáań ti-Dindaan marab nín bí yii ú ŋá puee bí mmɔnneeee!

²Bin ŋúb́ u-bɔkpaaŋi ní ki nyàab̀-u nì bi-pɔbiliŋ kɔkɔee bí mmɔnneeee!

³An nibee kaa ŋáań tikpitil, bi nóó u-saŋŋu ní.

⁴Sii ti-Dindaan di tīī-ti a-bɔkpaaŋi ní ki là yii tí nīn ŋúb́-ŋi tiŋan.

⁵Yàntī ḿ nīn cáá mbimbimɔntiim kí nīn tɔ́ a-koobiliŋ.

⁶Niinee, m-nimbikpeeŋu yaa bá a-marab kɔkɔ puee, icoo kaa làá cúú-mi.

⁷M làá nyɔ̄ŋkì-si nì dipɔbil diba kí nīn bífí tin a sòon̄ ki síiǹ tì bí deedeeyee.

⁸M làá nīn ŋúb́ a-koobiliŋ, taa dū-mi kí fá kɔkɔ.

⁹Mana ní unaacimpɔɔn ŋūǹ kí nīn cáá mbimbim min bí circiree? - See ú nīn ŋúb́ a-nyɔɔbundi.

¹⁰M nyàab̄-si nì m-pɔbil kɔkɔ, taa yàntī ḿ kàkatī kí wàatī a-marab.

¹¹M kpáafí a-nyɔɔbundi m-pɔbilin án nín làá ŋá pu ḿ taa yìntīǹ-see.

¹²Ti-Dindaan, si nì ditundi, a nín dàkā-mi a-koobiliŋee pu.

¹³M-nyɔkɔ làá māafì tin ní a sòon̄ ki síiǹee.

¹⁴M yaa nóó a-bɔkpaaŋee, an mɔ̄ǹ-mi kii m ká tigaajakpaandee.

¹⁵M làá dàkafì a-bɔkpaaŋi pu ní m-nimbikpeeŋu ń nīn bá a-saŋyi pu.

¹⁶An mɔ̄ǹ-mi a-koobiliŋ pu, maa súntí a-nyɔɔbundi pu.

¹⁷Ŋá man a-tɔntɔnliu tiŋan ḿ nīn bí dimaŋfalin, ní kí nīn ŋúb́ a-nyɔɔbundi.

¹⁸Ŋúbití m-nimbiliŋ ní ḿ ŋmā kí wāl̀ maamaacib bin bí a-marab poonee.

¹⁹Unicaan ní m sá kitiŋ nee pu, taa dū a-marab kí báĺ-mi.

²⁰M-naŋki fèefī ki nyàab̀ tin a sòon̄ ki síiǹee ŋyunti kamaa.

²¹A kpàtī bilambidambi bin bi tɔ́ mbusu, bi fàtī bi-boon ki tìì a-marabee pu.

²²Kàkatī icoo nì kpeefam kí wàatī-mi, di sá yii m ŋúb́ a-bɔkpaaŋi.

²³Báà abɔtibil yaa kpáfì ki bíi sòoǹ ki bɔ́ntí m-pu tibɔkpitilaaa, man a-tɔntɔnliu làá nīn pée dàkafī a-koobiliŋ pu ní.

²⁴An mɔ̄ǹ-mi a-bɔkpaaŋi pu, ŋíǹ di sá m-saŋkiliibi.

²⁵M dɔ̄ kitiŋ ntamin, fàtīí tīī-mi dimaŋfal kí nóó nì a-nyɔɔbundi.

²⁶M tùkū-si m-bimbim nín bí puee ní a kíí-mi, dàkà-mi a-koobiliŋ.

²⁷Yàntī ḿ gbìl̄ a-bɔkpaaŋi taapu, ní ḿ dàkafì a-maamaaci tuuŋŋi pu.

²⁸Kunimbaau yāntì nnyinnyim nyáń-mi, fàtīí tīī-mi mpɔn kí nóó nì a-nyɔɔbundi.

²⁹Kàkatī nnyimɔn saŋŋu kí wàatī-mi, ní a-laŋŋaŋfitiiku poonee, á yàntī ḿ béé a-marab.

³⁰M lēē ibaamɔn saŋŋu, m tɔ́ tin a sòon̄ ki síiǹee.

³¹M dū m-ba ki nákáǹ a-bɔkpaaŋi, ti-Dindaan, taa yàntī icoo ń jī-mi.

³²M bìǹ ki nyàab̀ kí nóó a-marab saŋŋu, di sá yii a yāntì m tɔ́ m-ba.

³³Ti-Dindaan, dàkà-mi a-koobiliŋ saŋŋu, m làá nīn nóó-ŋu kí tin cáá kátí.

³⁴Tīī-mi dinyil ḿ dūú ŋúb́ a-marab, m làá nīn tɔ́-bi nì m-pɔbil kɔkɔ.

³⁵Kpòotī-mi kí tàkan̄ a-marab saŋŋu pu, di sá yii bi-poon ní m kāntí m-mɔŋŋu.

³⁶Kpòon̄ m-pɔbil kí gíiǹ a-bɔkpaaŋi watil pú kí taa yàntī dí kpòon̄ kí gítí dulim gaajati pú.

³⁷Cúú m-nimbikpeeŋu kí páatí tin kaa bí tibanee pu, kí yàntī ḿ nīn bí a-saŋŋu poon.

³⁸A nín pōoǹ kí ŋá kí tīī bin fàŋkí-see puee, ŋá míǹ kí tīī man a-tɔntɔnliu.

³⁹Kàkatī m-cooi in fàantí-mi nee kí wàatī-mi, di sá yii tin a sòon̄ ki síiǹee di ŋān̄.

⁴⁰Tiŋman, m lafun néeń a-bɔkpaaŋi, a-deedeeu puee, fàtīí tīī-mi dimaŋfal.

⁴¹Ti-Dindaan, dàkà-mi a-neeŋkpaandi, fīī-mi kí nóó nì a nín lī puee.

⁴²Niinee m làá ká dinyɔɔbundi kí kíí bin sìí-mee, di sá yii a-nyɔɔbundi pu ní m máká.

⁴³Yàntī ibaamɔn nyɔɔbuŋŋi ń nīn pée nyēē m-nyɔkɔn ŋyunti kamaa, di sá yii tin a sòon̄ ki síiǹee pu ní m máká.

⁴⁴M làá nīn pée ŋúb́ a-marau ní kí nīn pée cáa cá jaanjaan.

⁴⁵M làá nīn còom̄ ki tɔ́ m-ba, di sá yii a-bɔkpaaŋi ní m nyàab̀.

⁴⁶M làá sòoǹ a-bɔkpaaŋi pu bibɔtiibi nimbiin ní an kaa làá nīn cáá-mi icoo.

⁴⁷A-marab tìì mmɔn, di sá yii m néeń-bi ní.

⁴⁸M yòontí m-ŋalii kí túĺ a-marab watil pú, di sá yii m néeń-bi. M làá dàkafì a-bɔkpaaŋi pu.

⁴⁹Téetí dinyɔɔbundi din a lī man a-tɔntɔnliu puee, di-pu ní m máká.

⁵⁰Báà m yaa bí falaa poonaaa, m kāntí diŋmeendi, di sá yii tin a sòon̄ee di tìì-mi dimaŋfal.

⁵¹Bilambidambi bēel̀-mi tikpil, ama maa fātì m-boon ki tīī a-marab.

⁵²Ti-Dindaan, m téetí tin a nìn sòon̄ ki síiǹ dooooyee pu, an di tìì-mi diŋmeendi.

⁵³M yaa ká binikpitib nín féeń a-marab puee, m fòol̄ mbum ŋkpitim pu ní.

⁵⁴Kitiŋ kin pu m kā kunicaŋu nee, a-bɔkpaaŋi di kpántì m-laŋyi.

⁵⁵Ti-Dindaan, m téetí a-yindi pu kunyeeu, ní ki ŋúb́ a-marab.

⁵⁶Tin di sá m-yatee di sá ḿ nīn ŋúb́ a-bɔkpaaŋi.

⁵⁷Ti-Dindaan, m lī yii dijandi din m lēēyee di sá ḿ nīn ŋúb́ a-nyɔɔbundi.

⁵⁸M nyàab̄ kí nīn fáatiǹ-si nì m-pɔbil kɔkɔ, sɔ̄ m-saai kí nóó nì tin a sòon̄ee.

⁵⁹M dākafì m-saŋkindi pu, m là kí fàtīí nīn tɔ́ a-bɔkpaaŋi.

⁶⁰M làá ŋá malaa, maa làá tàan̄ kí ŋúb́ a-marab.

⁶¹Binikpitib ŋmiii māntìi tú-mi, ama maa súntí a-marab pu.

⁶²M yíkí kunyataasiiu ní kí nyɔ̄ŋkì-si, di sá yii tin a sòon̄ ki síiǹee bí deedee.

⁶³M-bɔɔbi di sá bin kɔkɔ fàŋkí-si ní ki ŋúb́ a-bɔkpaaŋee.

⁶⁴Ti-Dindaan, a-neeŋkpaandi gbí kitiŋ kɔkɔ pu, dàkà-mi a-koobiliŋ.

⁶⁵Ti-Dindaan, a ŋá man a-tɔntɔnliu tiŋan ki nóó nì a-nyɔɔbundi.

⁶⁶Dàkà-mi nlandɔkɔmɔnti nì dinyil, di sá yii m máká a-marab pu.

⁶⁷Kí wàatī á sìntīǹ-mi taapuee, m nìn gáatì ní, ama kɔŋkɔnnee, m kíǹ ki ŋúb́ tin a sòon̄ee ní.

⁶⁸A ŋān̄ ní ki ŋáań tin ŋān̄ee, dàkà-mi a-koobiliŋ.

⁶⁹Bilambidambi sòon̄ tinyimɔmbɔti ki bíil̀-mi, ama mamee, m ŋúb́ a-bɔkpaaŋi nì m-pɔbil kɔkɔ ní.

⁷⁰Bi-pɔbiliŋ tīlifì, ama mamee, a-marab di tìì-mi mmɔn.

⁷¹A nín sīntiǹ-mi taapuee ŋá-mi tiŋan, di sá yii an tútuǹ-mi m bífì a-koobiliŋ.

⁷²Marab bin nyáń a-nyɔkɔnee ŋān̄ m-cee ki jítiǹ sindaariya nì animbil kúti kutukub cutimaanyi.

⁷³A dū a-ŋalii ní ki máń-mi ní ki tīī-mi mpɔn, tīī-mi dinyil ḿ dūú bīfì a-marab.

⁷⁴Bin fàŋkí-see yaa ká-mee, bi fàal̀ ní, di sá yii a-nyɔɔbundi pu ní m máká.

⁷⁵Ti-Dindaan, m nyí tin a sòon̄ ki síiǹee nín sá deedeeyee, ní a cáá ibaamɔn a nín sīntiǹ-mi taapuee.

⁷⁶A-neeŋkpaandee ń dāan̄ kɔŋkɔnnee kí ŋméeǹ-mi, kii a nín sòon̄ man a-tɔntɔnliu puee.

⁷⁷Dàkà-mi a-poommɔŋŋu ḿ nīn bí dimaŋfalin, di sá yii a-marab di tìì-mi mmɔn.

⁷⁸Icoo ń cúú bilambidambi bin kɔ́kɔĺ-mi fámee! Mamee, m làá nīn dàkafī a-bɔkpaaŋi pu.

⁷⁹Bin fàŋkí-see ń dāan̄ m-cee kí béé a-bɔkpaaŋi.

⁸⁰M làá nīn ŋúb́ a-koobiliŋ nì m-pɔbil kɔkɔ, án nín làá ŋá pu icoo ń taa cúú-mee.

⁸¹M kāl̀ ki cíitì a-fiil ki tin kpáàa gīī, m kā ki máká a-nyɔɔbundi pu.

⁸²M kpēē tin a sòon̄ee saŋŋu pú m-nimbiliŋ tin kpáàa lóoĺ, ní m bàlifī yii: «Ŋyunti ŋulɔŋu ní a làá ŋméeǹ-mi ní?»

⁸³M sá kii kuloou kun ŋŋminyiim ŋɔ́fì ku bɔ̄ntèe ní, ama maa súntì a-koobiliŋ pu.

⁸⁴Iwiin iŋa di kíǹ man a-tɔntɔnliu ḿ nīn bí dimaŋfalin ní? Ŋyunti ŋulɔŋu ní a làá sòoǹ bin sàantí-mee bɔti ní?

⁸⁵Bin yòontí bi-ba yilpu kaa fātìi tɔ́ a-marabee gbìn̄ mbòó ki píĺ kí sàl̄-mi.

⁸⁶A-marab kɔkɔ sá ibaamɔn marab ní, maa ŋá tiba ní bi bíi sàantí-mi, dāá jòoń-mi.

⁸⁷Bi nìn ŋman kūū-mi ki dóò ní, ama maa dū a-bɔkpaaŋi ki fá.

⁸⁸A-neeŋkpaandi puee, tīī-mi dimaŋfal ní ḿ nīn ŋúb́ a-bɔkpaaŋi.

⁸⁹Ti-Dindaan, a-nyɔɔbundi bí ní ki cá jaanjaan, dì bá yilpu ki pɔ̄ɔ̄ kiŋkiŋ.

⁹⁰A-deedeeu bí kí nīn cá abin abin. A báaǹ kitiŋ ní kì bá ki pɔ̄ɔ̄.

⁹¹Tikɔkɔ bí ti-laŋki ki dāa sāā díǹ ki nóó nì tin a sòon̄ ki síiǹee, di sá yii tin kɔkɔ bí duulinyanee sá a-tɔntɔnliibi ní.

⁹²A-marab yaa kaa bàà sá kun tìì-mi mmɔnnee, kɔnampu falaa bàà kūū-mi.

⁹³M kpá kí súntí a-bɔkpaaŋi pu jaanjaan, di sá yii a dī ŋi-pu ní ki tīī-mi dimaŋfal.

⁹⁴Sii di yì-mi, fīī-mi, di sá yii a-bɔkpaaŋi bɔti di páb́-mi.

⁹⁵Binikpitib cí kí lēē m-maŋfal, ama m dàkafī a-bɔkpaaŋi pu.

⁹⁶M dáań ki ká yii ki kpáaǹ tin ŋān̄ee cáá kigbeennyɔkɔ, ama a-marab bí ní ki cá talku.

⁹⁷M néeń a-marabeeee! M dàkafī bi-pu ŋwiin kamaa.

⁹⁸A-marab yāntì m cáá iciin ki jítiǹ m-nannanliibi, di sá yii m dū-bi ki gāā m-bindi kí nīn cá jaanjaan.

⁹⁹M nyíǹ m-dàkaliibi kɔkɔ, di sá yii m dàkafī a-bɔkpaaŋi pu.

¹⁰⁰M nyíǹ bitikpilib, di sá yii m kpáafí a-bɔkpaaŋi.

¹⁰¹M yíì kí nóó isaŋkpiti kí ŋmā kí nīn ŋúb́ a-nyɔɔbundi.

¹⁰²Maa fātì m-boon ki tīī a nín sòon̄ pu ki síiǹee, di sá yii sii di dàkà-mi.

¹⁰³Tin a sòon̄ee mɔ̄ m-nyɔkɔn cɔ́ncɔŋ ki jítiǹ tisiil.

¹⁰⁴A-bɔkpaaŋi puee, m cáá dinyil, an pu ní m ná tinyimɔmbɔti kɔkɔ.

¹⁰⁵A-nyɔɔbundi sá fitila ní ki ŋmíntí laakin m còom̄ee, ŋwalifi ki ŋmíntí m-saŋŋu.

¹⁰⁶M pūtì ki pōoǹ kí ŋúb́ tin a sòon̄ ki síiǹ tì bí deedeeyee, ní ki lafun làá ŋá míǹ.

¹⁰⁷M jíń falaa tikpilku, ti-Dindaan, tīī-mi dimaŋfal kí nóó nì a-nyɔɔbundi.

¹⁰⁸Ti-Dindaan, nlammɔntiim saraau un nyēē m-nyɔkɔnee ń fáatíǹ-si, kí dàkà-mi tin a sòon̄ ki síiǹee.

¹⁰⁹M bí dinimbinaamandin ní baabadal, ama maa súntì a-marau pu.

¹¹⁰Min kamaa binikpitib píĺ-mi kutaliŋŋuee, maa kākatì ki wāatì a-bɔkpaaŋi.

¹¹¹A-bɔkpaaŋi di sá m-fakal kí nīn cáa cá jaanjaan, ŋíǹ di tìì m-pɔbil mmɔn.

¹¹²M lēē m-pɔbilin kí ŋá a-koobiliŋ nín bí yii ḿ ŋá puee, m-paatii dee kí nīn cáa cá jaanjaan.

¹¹³M ná milimilidambi, ama ní ki néeń a-marau.

¹¹⁴Sii di sá m-balilaŋki nì m-gbampɔɔl. M máká a-nyɔɔbundi pu.

¹¹⁵Binikpitibee, sútímaan kí wàatī-mi, ní ḿ nīn ŋúb́ m-Nimbɔtiu marab.

¹¹⁶Nín̄ tíkí-mi kii a nín sòon̄ puee ní ḿ nīn bí dimaŋfalin, taa kɔ́ǹ-mi icoo m-mákal poon.

¹¹⁷Tíkiń-mi ní ḿ ká difiil, m-nimbikpeeŋu làá nīn pée cɔ́ a-koobiliŋ pu ní.

¹¹⁸A dū bin kɔkɔ kākatì ki wāatì a-koobiliŋee ki fá, di sá yii bi-ŋáaǹtam sá nnyimɔn ní.

¹¹⁹A féeń kitiŋ pu nikpitib kɔkɔ kii timool tin bi féeń ditampundi puee ní, an pu ní m néeń a-bɔkpaaŋi.

¹²⁰M-wunti kɔkɔ jìkì nì kufaaŋŋu a-nimbiin, ní a nín sòon̄ pu ki síiǹee fàantí-mi.

¹²¹M tɔ́ tin a sòon̄ ki síiǹee ki ŋá tin bí deedeeyee, taa dū-mi kí ŋá bin sàantí-mee ŋaan.

¹²²Líí man a-tɔntɔnliu dimákal yii m làá ká nnaam, yii bilambidambi kaa ti làá sàaǹ-mi!

¹²³M kpēē a-jòońdi nì difiil din a pōoǹee saŋŋu pú m-nimbiliŋ tin kpáàa gīī.

¹²⁴Dàkà man a-tɔntɔnliu a-neeŋkpaandi, bīfì-mi a-koobiliŋ.

¹²⁵M sá a-tɔntɔnliu ní, tīī-mi dinyil ḿ béé a-bɔkpaaŋi.

¹²⁶Ti-Dindaan, ŋyunti bàn̄ á tɔ̄ a-tundi: bi yīntiǹ a-marau.

¹²⁷An pu ní m néeń a-marab ki jítiǹ sindaariya, ki jítiǹ sindaariyamɔmmɔnti pu.

¹²⁸M ká yii a-bɔkpaaŋi kɔkɔ bí deedee ní, m ná tinyimɔmbɔti kɔkɔ.

¹²⁹A-bɔkpaaŋi sá maamaaci bɔkpaaŋi, an pu ní m pɔ̄ɔntí ki dī-ŋi.

¹³⁰Unil yaa ká a-nyɔɔbundee, dì tìì-u ŋwalifi ní, dì tìì sɔkɔmii nib dinyil.

¹³¹M-nyɔkɔ wāā bàaa m fátí diniindi, di sá yii m baasii néeń a-marab ní.

¹³²Fàtīń a-ba kí túĺ-mi kí sɔ̄ m-saai, kii a nín sòon̄ ki síiǹ kí ŋá bin néeń-see puee.

¹³³Dū a-nyɔɔbundi kí tīī-mi dimákal, taa yàntī tikpitil tiba ń nyàŋkiǹ-mi.

¹³⁴Fōō-mi bin sàantí-mee ŋaan kí líí, ní ḿ nīn ŋúb́ a-bɔkpaaŋi.

¹³⁵Bútí man a-tɔntɔnliu pu nnimbiin, ní kí bīfì-mi a-koobiliŋ.

¹³⁶M-nyinnyim pùub̀ kii mbunee, di sá yii baa ŋúb́ a-marab.

¹³⁷Ti-Dindaan, a sá deedeedaan ní, ní tin a sòon̄ ki síiǹee tèen̄.

¹³⁸A-bɔkpaaŋi ŋin a tīīyee sá deedee ní bi ŋūǹ kí nīn máká ŋi-pu.

¹³⁹M-bum fòol̄ m-ni lìblib kii ŋŋmee, kun puee m-nannanliibi súntí a-nyɔɔbundi pu.

¹⁴⁰Bi cɔ́ŋkì ki béè tin a sòon̄ee baamɔŋyi, ní man a-tɔntɔnliu néeń-tì.

¹⁴¹Maa bí tiban ní bi kpèé-mi fám, ama maa súntì a-bɔkpaaŋi pu.

¹⁴²A-deedeeu sá deedee un bí ki cá jaanjaanee, ní a-marab sá ibaamɔn marab.

¹⁴³Dinimbinaamandi nì kunimbaau cúú-mi, ama a-marab di tìì-mi mmɔn.

¹⁴⁴A-bɔkpaaŋi bí deedee ní ki cá jaanjaan, tīī-mi dinyil ḿ nīn bí dimaŋfalin.

¹⁴⁵M kúuǹ ki yíiń-si nì m-pɔbil kɔkɔ, kíí-mi, ti-Dindaan, m làá nīn ŋúb́ a-koobiliŋ.

¹⁴⁶M kúuǹ ki yíiń-si, dāá fīī-mi ní ḿ nīn ŋúb́ a-bɔkpaaŋi.

¹⁴⁷M yíkì ntaafaabɔmbɔm ki kúuǹ ki yíiń-si, m máká a-nyɔɔbundi pu.

¹⁴⁸Kunyamɔŋu kɔkɔee, maa pée dáb́, ki bí ki dàkafī tin a sòon̄ee pu.

¹⁴⁹Pīlifiǹ-mi a-neeŋkpaandi poon, ti-Dindaan, tīī-mi dimaŋfal kí nóó nì tin a sòon̄ ki síiǹee.

¹⁵⁰Bin sáń ki pá ikpiti boonee sútì ki pìlīń-mi, bi sáǹ ki wāatì a-marab.

¹⁵¹Ama sii ti-Dindaan pìlīǹ-mi, ní a-marab kɔkɔ sá ibaamɔn.

¹⁵²Dooooyee ní m nyí yii a tīī a-bɔkpaaŋi ŋí nīn bí ki cá jaanjaan.

¹⁵³Kpèè m-falaau kí fīī-mi, di sá yii maa súntì a-marab pu.

¹⁵⁴Mɔ̄tì m-pu ní kí dā-mi kí líí, tīī-mi dimaŋfal kii a nín sòon̄ puee.

¹⁵⁵Difiil dátiǹ binikpitib, di sá yii baa nyàab̀ a-koobiliŋ.

¹⁵⁶Ti-Dindaan, a-poon mɔ̄ tikpilku. Tīī-mi dimaŋfal kí nóó nì tin a sòon̄ ki síiǹee.

¹⁵⁷Bin sàantí-mee nì m-nannanliibi wīikí tikpil, ama maa fātì m-boon ki tīī a-bɔkpaaŋi.

¹⁵⁸M ká bin nyēē binib boonee ní m-naŋki nyáń nì bi, di sá yii baa ŋúb́ a nín sòon̄ puee.

¹⁵⁹Ti-Dindaan, kpèè m nín néeń a-bɔkpaaŋi puee. Tīī-mi dimaŋfal kí nóó nì a-neeŋkpaandi.

¹⁶⁰A-nyɔɔbundi nyeel di sá ibaamɔn, ní tin a sòon̄ ki síiǹee bí deedee kí nīn cá jaanjaan.

¹⁶¹Abɔtibil sāaǹ-mi an kaa cáá taapu, ama kun m-pɔbil fàŋkée di sá a-nyɔɔbundi.

¹⁶²M fàal̀ tin a sòon̄ee pu, a lì kii tigaajakpaandi tiba ní m kée.

¹⁶³M ná nnyimɔn, an cáá-mi titantan, ama a-marab ní m néeń.

¹⁶⁴M nyɔ́ŋkí-si ŋfunyɔm mita ní ŋwiin tin a sòon̄ ki síiǹee nín sá deedeeyee pu.

¹⁶⁵Bin néeń a-marabee bí dipɔɔsɔŋkilin ní, tiba kaa ŋūǹ kí yàntī bí gbéetí kí lítí.

¹⁶⁶Ti-Dindaan, m máká a-fiil pu, ní ki tɔ́ a-marab.

¹⁶⁷M ŋúb́ a-bɔkpaaŋi, m baasii néeń-ŋi ní.

¹⁶⁸M ŋúb́ a-bɔkpaaŋi nì a-bɔkpaafikaati, di sá yii a nyí tin kɔkɔ m ŋáańee.

¹⁶⁹Ti-Dindaan, yàntī m-kuŋkuuntii ń bàń-si, tīī-mi dinyil kí nóó nì a-nyɔɔbundi.

¹⁷⁰Yàntī m-gbaamii ń bàń-si, fīī-mi kí nóó nì a nín sòon̄ puee.

¹⁷¹M-nyunculiŋ ń tábití kí nyɔ̄ŋkì-si, di sá yii a dàkà-mi a-koobiliŋ.

¹⁷²M-nyɔkɔ làá dū tin a sòon̄ee kí gāā ilan, di sá yii a-marab kɔkɔ bí deedee ní.

¹⁷³Tàntī a-ŋal kí jòoń-mi, di sá yii a-bɔkpaaŋi ní m lēē.

¹⁷⁴Ti-Dindaan, kun m baasii lèe di sá á fīī-mi, ní tin tìì-mi mmɔnee di sá a-marau.

¹⁷⁵Tīī-mi dimaŋfal ḿ ŋmā kí nyɔ̄ŋkì-si, ní kí yàntī tin a sòon̄ ki síiǹee ń tūtuǹ-mi.

¹⁷⁶M tú ki yìiǹ kii dipibil din wáŋkèe. Nyàab̀ man a-tɔntɔnliu, di sá yii maa súntì a-marab pu.