Read Ntcham Psaumes 132 Bible Online

Psaumes 132 - Ntcham bible

Psaumes 132

¹Bi yaa cá Jeerusaleem kí jāam̀ Unimbɔtee ní bi gà nlan nee. Ti-Dindaan, téetí Daafiidi, nì u-gìŋ́ŋi kɔkɔ pu.

²Daafiidi di nìn pūtì ki pōoǹ ti-Dindaan, Jaakɔb Nimbɔtikpaaŋwu yii:

³«M kpá kí kɔ́ m-diikun, m kpá kí dòon̄ m-dooŋu pu,

⁴m kpá kí yàntī ŋgeem ń cúú-mi, m kpá kí púkuń,

⁵kin tin sāā ŋyunti ŋun m làá ká mpaan kí tīī ti-Dindaan, kí ká ŋkɔŋkoon ki tīī Jaakɔb Nimbɔtikpaaŋwuee!»

⁶Ti nìn gbìl̄ Dipoondi Dakaau pu Eefiraata tiŋkin, ti nìn ká-u Yaari satin.

⁷Tí kɔ́maan ti-Dindaan kɔŋkooŋŋun, tí gbàan̄ u-beejal taapu!

⁸Yīkìm̄, ti-Dindaan, dāan̄ a-ŋuŋfil paaŋŋu pu, sii nì Dakaa un poon ní a-pɔŋŋu bée!

⁹A-saraaŋaliibi ń dū ibaamɔn kí pèen̄ kii tiwampeeŋkaalee, bin yú nì si deedeeyee ń nīn fàal̀!

¹⁰A-tɔntɔnliu Daafiidi puee, taa fàtī a-boon kí tīī ubɔti un ní a lēēyee[227].

¹¹Ti-Dindaan nìn pōoǹ Daafiidi dipoondi nee. Ibaamɔn pu u kpá kí nyā dipoondi gbanti boon: «A-naantiibi kansikin ubɔ ní m làá dāá lēē kí kàan̄ a-beejal pu.

¹²A-jipɔmbi yaa ŋúb́ m-poondi nì abɔkpaa ŋin m tīī-bee, bi mun jipɔmbi làá dāá kàl̄ a-beejal pu kí nīn cá jaanjaan[228].»

¹³Di sá ti-Dindaan lafun lēē Siiyɔn jool, ki là dí nīn sá u-kɔŋkooŋŋu.

¹⁴U nìn lī yii: «M-ŋuŋfil paaŋŋu sèé kí nīn cáa cá jaanjaan. Doo ní m là kí nīn kóò.

¹⁵M làá bìin̄ Siiyɔn tiŋki boon kí tīī-kì tin kɔkɔ kì nyàab̀ee, m làá tīī bisoodambi bin kóò ki-nee tijin bí jī kí báĺ.

¹⁶M làá dū difiil kí pèen̄ ki-saraaŋaliibi, ní deedeedambi bin kóò ki-nee ń nīn fàal̀.

¹⁷M làá lēē Daafiidi naantiiu ubɔ Siiyɔn tiŋkin niin ú nīn cáá mpɔŋkpaan. Udaan làá nīn bí kii fitila un kaa kúù jaanjaanee ní[229].

¹⁸M làá dāá dū icoo kí pèen̄ u-nannanliibi, ama ní úǹ beefuuliiki ń nīn jìl̀ u-yil pu.»