Read Ntcham Psaumes 135 Bible Online

Psaumes 135 - Ntcham bible

Psaumes 135

¹Aleeluya, nyɔ̄ŋkìmaan ti-Dindaan! Nyɔ̄ŋkìmaan ti-Dindaan yindi, nimbi ti-Dindaan tɔntɔnliibi, nyɔ̄ŋkìmaan-u,

²nimbi bin bí ti-Dindaan diikun, ki bí ti-Nimbɔtiu diiku cindinee.

³Nyɔ̄ŋkìmaan ti-Dindaan, di sá yii u ŋān̄, gāāmaan ilan kí nyɔ̄ŋkì u-yindi, di sá yii di mɔ̄.

⁴Ti-Dindaan lēē Jaakɔb ú nīn sá u-yɔu, u lēē Isirayeel ú nīn sá u-gaajawammɔntiiti.

⁵Tiŋman, man nyí yii ti-Dindaan sá ukpaan, timbi Dindaan jítiǹ inimbɔti kɔkɔ.

⁶Ti-Dindaan ŋáań tin kɔkɔ u yaa lèe yilpu nì taapu, tiŋkubin nì inyiŋfi taapu taapu.

⁷U yàntī atagban ń nyānní kitiŋ gbeennyɔkɔ kí dāan̄, u yàntī utaa ń ŋmɔ́ kí nì, u nyāntí kubuŋu laakin u kpáafì-kuee.

⁸Úǹ di kūū Eejipiti yab biseebiyaamu nninjabiyaamu kí yòon̄ binib kí cáá sāā tiwaŋkuti[230].

⁹Sii Eejipiti tiŋki poonee, u nìn ŋá tidaandi nì maamaacib ki dáaĺ Faaroo nì u-tɔntɔnliibi kɔkɔ tafal[231].

¹⁰Úǹ di nāaǹ atimbun kupaau, ki kūū bibɔtiibi bin cáá mpɔnee:

¹¹bíǹ di sá Amɔɔr yab bɔtiu Siiwɔn, nì Baasan tiŋki bɔtiu Ɔɔgi[232], nì Kanaan yab bɔtiibi kɔkɔ.

¹²Míǹ boonee ní u dū bi-timmu ki tīī difakal, u dūu tīī u-nibul Isirayeel yab bí nīn yì.

¹³Ti-Dindaan, a-yindi làá nīn pée bí ní ki cá jaanjaan. Bi làá nīn pée téetí a-pu ní abin abin.

¹⁴Di sá yii ti-Dindaan sòoǹ ki pɔ̀ u-nibul, u sūǹ u-tɔntɔnliibi saai.

¹⁵Animbil kúti nì sindaariya ní bi dūu mɔ́ɔ́ atimbun ŋin kíǹee waaŋi, binib di dū bi-ŋalii ki mɔ́ɔ́-ŋi.

¹⁶Ŋi cáá kinyɔkɔ, ní kaa sòoǹ. Ŋi cáá animbil, ní kaa wāĺ.

¹⁷Ŋi cáá atafal, ní kaa gbìl̀. Báà kufoou kaa bí ŋi-nyɔmmun!

¹⁸Bin mɔ́ɔ́-ŋee ń nīn bí kii ŋi nín bí puee, ki kpáaǹ bin kɔkɔ máká ŋi-puee[233].

¹⁹Isirayeel yab, jāam̀maan ti-Dindaan. Aarɔn naantiibi, jāam̀maan ti-Dindaan.

²⁰Leefii yab, jāam̀maan ti-Dindaan. Nimbi bin fàŋkí ti-Dindaanee, jāam̀maan ti-Dindaan.

²¹Jāam̀maan ti-Dindaan un kóò Jeerusaleem Siiyɔn jool puee. Aleeluya, nyɔ̄ŋkìmaan ti-Dindaan!