Read Ntcham Psaumes 139 Bible Online

Psaumes 139 - Ntcham bible

Psaumes 139

¹Daafiidi di ŋmàn̄ nlan nee ki tīī bilaŋgaaliibi kpiliu. Ti-Dindaan, a cɔ́ŋkì-mi ki béè-mi.

²M yaa kāaa, m yaa yíkàaa, a nyí, a bí ndandati ní ki nyí m-landɔkɔi.

³M yaa còom̄aaa, m yaa dɔ̄ ki gèeǹaaa, a nyí, a nyí tin kɔkɔ m ŋáańee.

⁴Maa láá wāaǹ kinyɔkɔ ki lī tiba ní a nyí tin kɔkɔ m là kí lèe.

⁵A bí m-boon ki bí m-nyɔkɔpu, a dū a-ŋal ki páaǹ m-pu.

⁶A nín nyí-mi pu tikpilee cáá-mi maamaaci, an jítì m-landɔkɔŋu pu ḿ ŋmā kí gbìl̄ taapu.

⁷La ní m ŋūǹ kí cù kí nīn dátiǹ a-Fam ní? La ní m ŋūǹ kí sāǹ kí cù ní aa bí niin ní?

⁸M yaa nín jɔ́ḿ yilpuɔɔɔ, a bí niin, m yaa tí dɔ̄ ditaŋkpiilinaaa, a bí niin.

⁹M yaa túkú ifeen ki ŋàan̄ ki búntì ditiŋkugbandi lapu pu yal kí nīn kóòyaaa,

¹⁰a-ŋal bí niin mun kí kpòotī-mi, a-ŋaŋgiil bí niin kí tíkiń-mi.

¹¹M yaa bí yii: «Dibɔmbɔndi ń dāá bìin̄ m-pu, ŋwalifi ŋun māntìi tú-mee ń kpántí kunyeeuaaa!»

¹²sii ceeyee, dibɔmbɔndi kaa sá dibɔmbɔndi, ní kunyeeu wāĺ kii ŋwìińee. Dibɔmbɔndi nì ŋwalifi sá sii cee tiwambaantiil ní.

¹³Sii di náań m-landɔkɔjaatiŋu, sii di máń-mi ki tākaǹ m-na poon.

¹⁴M jáaḿ-si, kun puee a náań-mi ní m-wunti sá maamaaci ní ki ŋān̄ tikpil. A-tuuŋŋi sá maamaaci tuuŋŋi, m nyí míǹ tiŋan.

¹⁵Ŋyunti ŋun a nìn bíi nāantí-mi dibalin, ní ki nìn bíi māā-mi ki tàkantí m-na poonee, m-wunti laaba kaa nìn bí dibalin a-cee.

¹⁶Ŋyunti ŋun m nìn dáá sá nnaantee, a nìn wāĺ-mi. Kí wàatī iwiin in a tīī-mi ḿ dūú kàl̄ kitiŋ puee ń kíĺee, a nìn ŋmàn̄ i-nyɔkɔm ki ŋá a-gbɔŋkun ki síiǹ.

¹⁷Unimbɔti, a-landɔkɔi pɔ̄ɔ̄ ḿ ŋmā kí gbìl̄ taapu, i wīikí ní an kaa cáá ŋkaan.

¹⁸M yaa bí yii ḿ kàaǹ-iee, i làá nīn wīikí ki jítiǹ dibul pu. M yaa fīntèe, m gbíntìi bí a-cee.

¹⁹Unimbɔti, an sá á kúntí binikpitib ní kí jà binikpɔliibi kí wàatī-mi.

²⁰Bi cáá a-yindi ki ŋmàtíǹ binib ní, bi yíì a-yindi ki cáa ŋáań ikpiti.

²¹Ti-Dindaan, mana ní ḿ taa nín̄ ná bin ná-see, maa là kí ká bin jáà nì see.

²²M baasii ná-bi ní, bi kpántì man m-ba nannanliibi ní.

²³Unimbɔti, kpèè m-pɔbil poon kí béé-mi, cɔ̄ŋkì-mi ní kí béé m-landɔkɔi.

²⁴Kpèè m yaa tàkā nsaŋkpiti poon, ní kí kpòotī-mi kí tàkan̄ a-saŋŋu pu.