Read Ntcham Psaumes 140 Bible Online

Psaumes 140 - Ntcham bible

Psaumes 140

¹Daafiidi di ŋmàn̄ nlan nee ki tīī bilaŋgaaliibi kpiliu.

²Ti-Dindaan, fīī-mi kí nyāntí binikpitib ŋaan, wúń m-pu bin dàkà tipɔmbɔtee cee.

³Bi pée dàkafī kí ŋá tikpitil ŋma ní, baabadalee, bi jāantí binib ní.

⁴Bi-limbiliŋ jītí kii ukoobuee, ukoowaati looti kā bi-nyɔkɔn[242].

⁵Ti-Dindaan, taa yàntī ḿ kɔ́ binikpitib ŋaan. Bin dàkà tipɔmbɔti, ki nyàab̀ ḿ lítée ceeyee, wúń m-pu.

⁶Bilambidambi píĺ-mi kutaliŋŋu. Bi dū iŋmii nì kulaaŋŋu ki píĺ-mi nsan caŋin, bi píĺ-mi kpalaabi.

⁷Ama m bí ti-Dindaan yii: «A sá m-Nimbɔtiu! Ti-Dindaan, kpòon̄ a-tafal kí pīlifì m-gbaamii.

⁸Ti-Dindaan Unimbɔti, sii un di sá mpɔn ŋun fìil̄-mee, dikɔ̀ndi wiiŋŋuee, a bìintí m-yil pu.

⁹Ti-Dindaan, taa yàntī binikpitib nee ń ká kun bi nyàab̀ee, taa yàntī bí ŋmā kí ŋá tin bi bɔ́ntèe, an yaa kaa sá mimmee, bi làá nīn yòontí bi-ba yilpu.

¹⁰Yàntī bi nín sòon̄ kí ŋá-mi tikpitil tiŋyee ń fàtīí gítí bíǹ bi-ba yil pu!»

¹¹Yàntī amɔsiŋkoon ń sìtī bi-pu, Unimbɔti ń yàntī bí jēetí ŋŋmin, bí jēetí kuboou kun nyóò, baa ti làá ŋmā kí nyēe poon!

¹²Bin cāab̀ bi-jutiibi disambiilee kaa máaǹ kí kàl̄ kitiŋ nee poon. Nnaabu ń nīn pée kā unil un dàkà tipɔmbɔtee pu!

¹³M nyí yii ti-Dindaan làá sòoǹ unandaan bɔti kí tīī-u, u làá sòoǹ kí pɔ̀ ufalaadaan.

¹⁴Tiŋman, deedeedambi làá nyɔ̄ŋkì a-yindi, binib bin pɔbil bí dibee làá nīn bí a-nimbiin.