Read Ntcham Psaumes 143 Bible Online

Psaumes 143 - Ntcham bible

Psaumes 143

¹Daafiidi di ŋmàn̄ nlan nee. Ti-Dindaan, pīlifì m-wimmeem, kpòon̄ a-tafal kí pīlifì m-gbaamii. A nín ŋān̄ ki sá deedeedaan puee, kíí-mi.

²Taa sòoǹ man a-tɔntɔnliu bɔti, di sá yii unifoo ubɔ kaa bí ki sá deedeedaan a-nimbiin[244].

³M-nannanliu sāaǹ-mi, u dū-mi ki lúkú kitiŋ ki tàn̄ tàn̄. U yāntì m kɔ́ dibɔmbɔndin kii bin kpíì dooooyee.

⁴M-wunti yɔ̄tì, maa ti cáá mpɔn.

⁵M téetí iyunti in jítèe pu, m dàkafī tin kɔkɔ a ŋée pu, m dàkafī a-tuuŋŋi pu.

⁶M yōoǹ m-ŋal ki túĺ-si, m fèefī ki nyàab̀-si kii kitiŋ nín fèefī ki nyàab̀ utaa puee.

⁷Ti-Dindaan, kíí-mi malaa, maa ti cáá ŋfam. Taa fàtī a-boon kí tīī-mi, an yaa kaa sá mimmee, an dóò m-pu.

⁸Yàntī ḿ gbìl̄ a-neeŋkpaandi pu kutaafaau, di sá yii sii pu ní m máká. Dàkà-mi nsan ŋun m máaǹ kí nóóyee, di sá yii sii watil pú ní m fātì m-ba ki túĺ.

⁹Ti-Dindaan, fīī-mi kí nyāntí m-nannanliibi ŋaan, sii ní m sáǹ ki kɔ́.

¹⁰Bīfì-mi ḿ ŋmā kí ŋá tin fáatiǹ-see, di sá yii sii di sá m-Nimbɔtiu. A-Fam ŋān̄ ní, mí kpòotī-mi kí dī kitiŋ kin kaa cáá diganlakalee pu.

¹¹Ti-Dindaan, a-yindi puee, tīī-mi dimaŋfal. A-deedeeu puee, nyāntí-mi dinimbinaamandin.

¹²A-neeŋkpaandi poonee, a làá kúntí m-nannanliibi, kí kpɔ̀ bin jáà nì mee kɔkɔ, di sá yii m sá a-tɔntɔnliu ní.