Read Ntcham Psaumes 144 Bible Online

Psaumes 144 - Ntcham bible

Psaumes 144

¹Daafiidi di ŋmàn̄ nlan nee. M jáaḿ ti-Dindaan, m-taŋkpanaakooku! U dàkà-mi bi nín jáà kujaau puee, u bɔ́ntí-mi ki cīití dikɔ̀ndi wiiŋŋu.

²U sá m-mákal nì m-taŋkpanaakooku, ki sá m-balilaŋki nì m-fiiliu, ki sá m-gbampɔɔl, úǹ ní m sáń ki kóò. Úǹ di dū m-nibooliŋu ki ŋá m-taapu.

³Ti-Dindaan, unil sá ba ní u-bɔti páb́-si míǹ, nisaal sá ba ní a dàkafī u-pu míǹ[245]?

⁴Unil náań nì kubuŋu ní, ní u-wiiŋyi bí kii mboon nín jītí puee.

⁵Ti-Dindaan, kpáb́ kutagbɔŋu kí kpákatiń. Gbēē ajoon ŋí nīn bíi dùkù.

⁶Yàntī utaa ń ŋmɔ́ kí jà a-nannanliibi kí yàaǹ, tɔ̄ń a-piiŋyi kí jà-bi bí sāǹ.

⁷Tàntī a-ŋal doooo yilpu kí fīī-mi. Fīī-mi kí nyāntí nnyiŋkpaam nee ni, nì binicambi ŋaan.

⁸Bíǹ bin nyɔmmu sòoǹ tinyimɔmbɔti ní bi yaa yōoǹ bi-ŋaŋgiil ki pūtì bi mɔ́ntée.

⁹Unimbɔti, m làá gāā nlampɔɔn kí nyɔ̄ŋkì-si, m làá bɔ̀ɔ̀ iŋmii saalaa beeku kí tīī-si tinyool.

¹⁰Sii di tìì bibɔtiibi dijajil, sii di fīī a-tɔntɔnliu Daafiidi kitàataajiki kin kùee cee ki líì.

¹¹Fīī-mi kí nyāntí binicambi bin nyɔmmu sòoǹ tinyimɔmbɔti, ní bi yaa yōoǹ bi-ŋaŋgiil ki pūtì bi mɔ́ntée ŋaan.

¹²Yàntī bi-pɔntinee, ti-jipɔmbi ń nīn bí kii isufi in wíiǹ tiŋanee, ní ti-bisalib ń nīn bí kii jaantalkub bin bi kpítì ki dūu nyáantì kubɔtinaakoouee!

¹³Yàntī ti-cakalaabi ń gbí, kí nīn cáá tijin kɔkɔ nì ti-bulifi! Yàntī ti-piii nì ti-ŋoobui ń bùtī ŋfunyɔm kutuku pu, ŋfunyɔm kutukub saalaa pu ti-naakpaapɔɔkun!

¹⁴Ti-naai ń nīn bí màlmal! Ti-tiŋki guŋŋi ń taa bátí kí lítáaa, bí taa cúú-ti kuyuŋuaaa, kí taa gbìl̄ binib gbáà ibiil ti-mɔŋkijaai pu!

¹⁵Dinibul din cáá tin bí nee kɔkɔee bí mmɔnneeee! Dinibul din Nimbɔtiu sá ti-Dindaanee bí mmɔnni!