Read Ntcham Psaumes 145 Bible Online

Psaumes 145 - Ntcham bible

Psaumes 145

¹Daafiidi di ŋmàn̄ inyɔŋki laŋŋu nee. M-Nimbɔtiu, m-bɔtiu, m làá yòon̄ a-yindi yilpu, m làá jāam̀-si kí nīn cáa cá jaanjaan.

²M làá nīn jáaḿ-si baabadal ní kí nīn nyɔ́ŋkí a-yindi kí taa gbèen̄.

³Ti-Dindaan sá ukpaan ní ki máaǹ inyɔŋki, baa ŋūǹ kí dū u nín sá ukpaan puee kí ŋmàntīǹ tiba.

⁴Ŋyunti ŋubɔ poon nib làá sòoǹ a-tuuŋŋi pu kí nàatī ŋun làá dāá páańee yab, bi làá māafì a-tuŋkpaaŋŋi ŋin a túńee!

⁵M làá sòoǹ kí gíti sòoǹ a-nyooti nín ŋān̄ puee pu, m làá sòoǹ kí bùsì a-maamaaci tuuŋŋi pu.

⁶Bi làá sòoǹ a-pɔŋkpaaŋŋu pu! Mamee, m làá māafì a-tuŋkpaaŋŋi pu.

⁷Bí téetí a-ŋaŋkpaanti pu, bí nīn gà ilan ki fàal̀ a nín sá deedeedaanee pu.

⁸Ti-Dindaan poon mɔ̄ ní ki cáá kulaŋŋaŋfitiiu, waa gífí diŋuul malaa ní u-neendi wīikí tikpilku.

⁹Ti-Dindaan ŋān̄ ki tīī báà ŋma, u-poon mɔ̄ u-wannaaŋkaati kɔkɔ pu.

¹⁰Ti-Dindaan, a-wannaaŋkaati kɔkɔ ń nyɔ̄ŋkì-si, bin yú nì si deedeeyee ń jāam̀-si!

¹¹Bí lì yii a-beel cáá tinyool, bí sòoǹ a-pɔŋŋu pu!

¹²Mimmee bi làá yàntī binib ń béé a-tuŋkpaaŋŋi, nì a-beel nyooti nín jìl̀ puee.

¹³A-beel sá jaanjaan beel ní, a-pɔŋŋu bí ní ki cá abin abin. Ti-Dindaan yaa pōoǹ kí ŋá puee, míǹ ní u ŋáań, u dàkà u-neendi u-tuuŋŋi kɔkɔ poon.

¹⁴Ti-Dindaan di tīkintí bin kɔkɔ cá kí lítée, úǹ di yáatí bin bōōyee.

¹⁵Bi-kɔkɔ nimbikpeeŋu cɔ́ a-pu nì dimákal, ní a tìì-bi tijin ŋyunti ŋun an máaǹee.

¹⁶Sii di tàntī a-ŋal ní ki tìì tin kɔkɔ cáá kufoouee tijin tí jī kí díkí.

¹⁷Ti-Dindaan sá deedeedaan tin u ŋáańee kɔkɔ poon, u dàkà u-neendi u-tuuŋŋi kɔkɔ poon.

¹⁸Ti-Dindaan pìlīǹ bin kɔkɔ yíì-uee, bin yíì-u nì mbaamɔnee.

¹⁹Bin fàŋkí-uee yaa là kuŋyee, u ŋáań ki tìì-bi ní, u pílifí bi-biilii ní ki fìil̄-bi.

²⁰Ti-Dindaan wúǹ bin kɔkɔ néeń-uee pu, ama u làá kpɔ̀ kí céetí binikpitib kɔkɔ.

²¹M làá gāā ilan kí nyɔ̄ŋkì ti-Dindaan, tin kɔkɔ cáá kufoouee ń jāam̀ u-circir yindi kí nīn pée cá jaanjaan.