Read Ntcham Psaumes 147 Bible Online

Psaumes 147 - Ntcham bible

Psaumes 147

¹Aleeluya, nyɔ̄ŋkìmaan ti-Dindaan! An ŋān̄ tí gāā ilan kí nyɔ̄ŋkì ti-Nimbɔtiu, an mɔ̄ ní ki máaǹ tí nyɔ̄ŋkì-u!

²Ti-Dindaan un fātìi máń Jeerusaleem tiŋkee làá kóoǹ Isirayeel yab bin bi cúú kuyuŋuee kí kpāfì.

³Úǹ di cāantí bin pɔbiliŋ bíil̀ee, ní ki fíntí bi-buuŋyi.

⁴U kàaǹ iŋmalbijaa, ki pūǹ i-kɔkɔ ayin.

⁵Ti-Dindaan sá ukpaan ní ki cáá mpɔŋkpaan, u-nyil kaa cáá kigbeennyɔkɔ.

⁶Ti-Dindaan tīkintí bin sīntiǹ bi-ba taapuee, ama u sìntīǹ binikpitib taapu taapu.

⁷Ní gāāmaan ilan kí jāam̀ ti-Dindaan, bɔ̀ɔ̀maan kubeeu kí pàkà ti-Nimbɔtiu.

⁸Úǹ di dù atagban kí bìin̄ yilpu, ní kí yàntī utaa ń nì kitiŋ pu. U yàntī timool nyēē ajoon pu.

⁹U tìì tiwaŋkuti nì digaliŋgaal biyaamu mun sūǹ ki nyàab̀ tijinee tijin.

¹⁰An kaa sá utaamu pɔŋŋu di tìì-u mmɔn, kaa tí sá utaatanli pɔ́ɔǹtam di mɔ̄ǹ-u,

¹¹ama ti-Dindaan nyàab̀ bin fàŋkí-u ní ki máká u-neeŋkpaandi puee ní.

¹²Jeerusaleem, nyɔ̄ŋkì ti-Dindaan, Siiyɔn, pàkà a-Nimbɔtiu.

¹³Di sá yii u mɔ̄tìi tīī a-punuubi kpàlkaati mpɔn. U bīiǹ a-nib bin kóò a-nee pu.

¹⁴Úǹ di tìì a-tiŋki ŋgbansɔŋfi, ní ki tìì-si bileemɔnti á jī kí díkí.

¹⁵U tin pée lì yii u tūǹ u-marab kitiŋ puee, u-nyɔɔbundi kpáà sáǹ malaa malaa ki ŋá míǹ[247].

¹⁶U yàntī ntaayim lítí ní ki pīiǹ káŋkaŋ kii gulfee. U yàntī nnyim kìl̀ ki kíǹ ki dɔ̄ kii ŋfantamee.

¹⁷U yàntī nnyim kìl̀ ki kpántí kii ataŋkpeeyee ní u cáa tòoń. An nín sɔ̀m̀ puee, ubɔ kpá ki làá ŋmátí.

¹⁸Ama u yaa tīī maree, ní an kɔkɔ ń dùntī, u yàntī kubuŋu ń fáá ní an kpántí nnyim ki pùub̀.

¹⁹U lēē u-nyɔɔbundi ki dàkā Jaakɔb, u-bɔkpaaŋi nì tin u sòon̄ ki síiǹee ki dàkā Isirayeel.

²⁰Waa pée ŋá míǹ ki tīī ditimbundi diba, ditimbundi diba kaa bí ki nyí tin u sòon̄ ki síiǹee. Aleeluya, nyɔ̄ŋkìmaan ti-Dindaan!