Read Ntcham Psaumes 17 Bible Online

Psaumes 17 - Ntcham bible

Psaumes 17

¹Daafiidi wimmeem. Pīlifiǹ-mi, m-Dindaan, m bíi mèé-si á pɔ̀-mi ní. Kpòon̄ a-tafal kí pīlifì m-wimmeem min nyánní dipɔɔmɔntiilinee.

²Sòoǹ m-bɔti kí pɔ̀-mi, a nyí ibaamɔn laŋki.

³A kpēē m-pɔbil poon, ki dɔ́miń m-cee kunyeeu ki cɔ́ŋkì-mi, kaa ká tikpitil tiba m-ni. M lēē m-pɔbilin yii maa làá dū m-nyɔkɔ kí sòoǹ kí ŋá ikpiti,

⁴kii bin kíǹee nín ŋáań puee. M tɔ́ a-marab kaa dī bin ŋáań tipɔmbɔtee saŋŋu.

⁵M pée tàkā nsan ŋun a cátèe poon ní, m-taal kaa ŋātì ki nyáń ŋu-poon.

⁶Unimbɔti, sii ní m kūuntí ki yíì, di sá yii a làá kíí-mi, kpòon̄ a-tafal kí pīlifì tin m làá sòoǹee.

⁷Dàkà a-nib dineeŋkpaandi din a cáá bi-puee, sii un fìil̄ bin kɔkɔwoooo sáń bi-nannanliibi ki kóò-see.

⁸Ŋúb́-mi kii sii a-ba nimbibulee, dū-mi kí báĺ a-feeŋyi taapu[23]

⁹binikpitib bin là kí nàan̄-mee nì m-nannanliibi bin māntìi tú-mi ki là kí kpɔ̀-mee ń taa ká-mi.

¹⁰Bi cáá nnimbinaakulim kaa sūǹ isaa, ní ki cáá bi-nyɔmmu ki sòoǹ tilambibɔti.

¹¹Bi tà ki kíbití-mi, bi kpáàa māntìi tú-mi. Bi pée cɔ́ŋkí-mi ki nyàab̀ ŋyuntimɔnti kí kùl̄-mi kí yā kitiŋ ní.

¹²Bi bí kii digbikintipɔmbil din bɔ́ntì ki cí kí cúú upeel kí tɔ̀ntēe ní, a lì kii upeecuncuti un náká ki cée.

¹³Yīkìm̄, m-Dindaan! Já kí pɔ̄ɔkiǹ bin ná-mee. Dū a-janjajiki kí fīī-mi kí nyāntí binikpitib ŋaan.

¹⁴Ti-Dindaan, dū a-ŋal pɔŋŋu kí jà-bi kí nyāntí binib kansikin. Jà-bi kí nyāntí binib kansikin nì duulinyan. Dū ditafadaaldi din a bɔ́ntì ki síiǹ-bee kí nyùntī-bi, bi-biyaamu mun ń nyɔ̀ kí díkí kí kíń kí tīī mu mun biyaamu.

¹⁵Ama man jandi púee, m làá nīn bí a-nimbiin kun puee maa cáá dibɔkpil diba m-ni. M yaa láa fīntèe, m-pɔbil làá sɔ̀ŋkì kun puee m bí laakin a bée.