Read Ntcham Psaumes 19 Bible Online

Psaumes 19 - Ntcham bible

Psaumes 19

¹Daafiidi di ŋmàn̄ nlan nee ki tīī bilaŋgaaliibi kpiliu.

²Yilpu sòoǹ-ti Unimbɔti nyooti pu, ní kutagbɔŋu lèekī tin u ŋée ki dàkà-ti.

³Ŋwiin kamaa sòoǹ Unimbɔti nyooti pu ki nàatī ŋwiin ŋun dī-ŋuee, ní kunyeeu kamaa mun bùsī kaa gbèentí ki tùkù kunyeeu kun dī-kuee.

⁴An kaa sá isoon poon, kaa tí sá nì anyɔɔbun mun, ditafal mun kaa tí gbìl̀ bi-nyɔkɔ pu.

⁵Ama tin bi lèe bàn̄ kitiŋ kɔkɔ, ní tibɔti tin bi sòoǹee mun bàn̄ kitiŋgbeennyɔkɔ[26]. Unimbɔti gāā tanti yilpu ki tīī ŋwìiń ŋú nīn kóò.

⁶Ŋwìiń nyēē kii unimpucaan cal nín nyēeń u-diikun kutaafaau puee ní, a lì kii an nín mɔ̄ǹ un sáń kpaŋkpakantiku taatandee ú sāǹ puee.

⁷Ŋu yíkí kutagbɔŋu gbeennyɔkɔ kiba ní kí yìiǹ kí tin dòon̄ kin kíǹee, tiba kaa ŋūǹ kí sāǹ kí nyā ŋu-tuntuŋkun.

⁸Ti-Dindaan marab ŋān̄ ní, bi tìì-ti dimaŋfapɔndi. Ti ŋūǹ kí nīn máká tin ti-Dindaan sòon̄ ki síiǹee pu, tíǹ di tìì ugbaan iciin.

⁹Ti-Dindaan bɔkpaaŋi tèen̄ ní, ŋi tìì unil pɔbil mmɔn. Ti-Dindaan marab wāĺ ní bɔ́iii, bi tìì unil dinimbiŋubitil ní.

¹⁰An ŋān̄ binib ń nīn jáaḿ ti-Dindaan, bi làá nīn jáaḿ-u ní kí nīn cá jaanjaan. Ti-Dindaan marab sá ibaamɔn ní, marab gbanti kɔkɔ sá deedee marab ní.

¹¹Ti-Dindaan marab cáá kunyampoou ki jítiǹ sindaariya, ki jítiǹ gba sindaariyamɔnti tikpil, ki mɔ̄ ki jítiǹ tisiil, ki mɔ̄ ki jítiǹ gba kisikampiŋ siiti tin bi dáá ŋmáaḿee.

¹²Kí kūtèe, bíǹ di dàkà man a-tɔntɔnliu. M yaa ŋúb́-bee, m fòol̄ tiwammɔntiil ní.

¹³Ŋma di ŋūǹ kí béé yii u yīntì? M-Dindaan, dū m-kpitii in pu maa nyée kí pɔ̄-mi.

¹⁴Kàkatī ikpiti in m nyí ki ŋée kí wàatī-mi, taa yàntī í jī m-pu dibeel. Niinee maa làá yìntīǹ-si kí fōō dibɔkpil.

¹⁵Yàntī m-nyɔɔbuŋŋi nì m-landɔkɔi ń nīn fáatiǹ-si. M-Dindaan, sii di sá m-taŋkpanaakooku nì m-fiiliu.