Read Ntcham Psaumes 20 Bible Online

Psaumes 20 - Ntcham bible

Psaumes 20

¹Daafiidi di ŋmàn̄ nlan nee ki tīī bilaŋgaaliibi kpiliu.

²Ti-Dindaan ń fōō a-wimmeem dinimbinaamandi yuntiŋu poon. Jaakɔb Nimbɔtiu u-ba ń wúń a-pu.

³Ú nyānní u-circir kɔŋkooŋŋun kí dāá tūtuǹ-si, ú nyānní Siiyɔn jool pu kí dāá jòoń-si.

⁴Ú fōō a-saraabi kɔkɔ, a-saraawɔkaabi mun ń fáatiǹ-u.

⁵Ú tīī-si kun fáatì a-pɔbilee, ní kí yàntī tin a bɔ́ntì kí ŋée ń bútí-si.

⁶Ú yàntī tí fàal̀ a-jajil pu, ní tí fáá sámbu kí nyɔ̄ŋkì ti-Nimbɔtiu, ti-Dindaan ń tīī-si tin kɔkɔ a yaa bālifèe.

⁷Kɔŋkɔnnee, m béè yii ti-Dindaan tìì ubɔti un ní úǹ u-ba lēēyee dijajil. Doooo u-circir beel poon ní u fòol̄ u-wimmeem, ní ki cáá u-pɔŋkpaaŋŋu ki tìì-u ajajikpaan.

⁸Biba máká bi-janjatɔrɔkub pu, ní biba mun máká bi-taamui pu, ama timbee, ti-Dindaan ti-Nimbɔtiu yindi pu ní ti máká.

⁹Bíǹ wunti làá kpú ní bí lítí, ama timbee, ti làá nīn yú dicancaal ní ki pɔ̄ɔ̄.

¹⁰Ti-Dindaan, tīī ubɔti dijajil, ti yaa kúuǹ ki yíiń-uee, ú kíí-ti.