Read Ntcham Psaumes 22 Bible Online

Psaumes 22 - Ntcham bible

Psaumes 22

¹Daafiidi di ŋmàn̄ nlan nee ki tīī bilaŋgaaliibi kpiliu.

²M-Nimbɔtiu, m-Nimbɔtiu, ba ŋá ní a dū-mi ki fá[27]? M gbáń ibiil ki tin gīī, ama difiil dáá gbíntìi dátiǹ-mi.

³M-Nimbɔtiu, m kúuǹ ki yíiń-si ŋwiimpu, ama ní aa kíí-mi. M yíiń-si kunyeeu mun, ama ní kaa ká diŋuŋfil.

⁴Too, sii mun di sá circirdaanee, a kā a-beejal pu ní Isirayeel nyɔ́ŋkí-si.

⁵Sii pu ní ti-baabi nìn máká, bi nìn máká a-pu ní a fìil̄-bi.

⁶Bi nìn kūuntí ki yíì-si ní a fìil̄-bi, bi nìn dù bi-mákal kí páań a-pu ní icoo kaa jīǹ-bi.

⁷Ama mamee, m kpántì kii ujiliŋkpaamee ní, maa ti sá nil. Binib sìí-mi ní báà ŋma kpèé-mi fám.

⁸Un yaa pée ká-mee bèel̄-mi ní, bi dɔ̀tī bi-nyunculiŋ ní ki gbákafí bi-yiliŋ ki lì yii[28]:

⁹«Kéè u bí yii u máká ti-Dindaan pu naa! Too, ti-Dindaan ń fīī-u tí kpèè. Ti-Dindaan yaa néeń-uee, ú jòoń-u tí kpèè[29]!»

¹⁰Sii di nyántìń-mi m-na poon, ní ki lōō-mi m-na taaŋi pu.

¹¹Bi nín pée màl̄-mee, sii ŋaan ní m bí. Kí wàatī bí màal̀-mi muee, sii di nìn pée sá m-Nimbɔtiu.

¹²Nín̄ bí ki kɔ́ĺ-mi, di sá dinimbinaamandi kaa dátiǹ-mi, ní ubɔ mun kpá kí jòoń-mi.

¹³M-nannanliibi tikpil māntìi gɔ́ń-mi kii inajaayee, Baasan tiŋki najakpaaŋyi māntìi tú-mi.

¹⁴Bi wāaǹ bi-nyɔmmu bàaa m-pu, a lì kii gbikintib di cúú tinan ki làá tɔ̀ntēe.

¹⁵M kpántì kii nnyimee ní ki pùub̀, m-taaŋi kpíì maa ti ŋūǹ kí sīĺ, m-pɔbil dūntì m-poon kii nsikampimuee.

¹⁶M-neen kūń kii dikàlee, ní m-limbil dūu nákáǹ m-neen. A dū-mi ki síiǹ nnyiŋkúm saŋŋu pu.

¹⁷M-nannanliibi bin bí kii ibooyee māntìi gɔ́ń-mi, digaŋgam dambi dikitimɔndi māntìi tú-mi, bi sāā ki cíl̀ m-ŋalii nì m-taaŋi.

¹⁸M dúntì ki kíǹ akpab ŋma, ní m-nannanliibi kpèé-mi cìii.

¹⁹Bi dū m-wampeeŋkaati ki yākatì, ní ki tɔ́ m-bɔkutifɔkɔl pu kasi[30].

²⁰Ama sii m-Dindaan, á taa nín̄ dátiǹ-mi, sii un tìì-mi mpɔnee, dāan̄ malaa kí jòoń-mi.

²¹Taa yàntī m-nannanliibi ń dū bi-tàataajimmu kí kpɔ̀-mi. Fīī-mi kí nyāntí iboo nee ŋaan.

²²Fīī-mi kí nyāntí gbikinti nyɔmmun, kí nyāntí-mi upɔɔnaa yiŋyin. A fōō m-wimmeem.

²³M làá sòoǹ a-yindi pu kí tùkù m-nabiyaamu, m làá nyɔ̄ŋkì-si samaa kansikin[31].

²⁴Nimbi bin tɔ́ ti-Dindaan ki jáaḿ-uee, ní nyɔ̄ŋkì-u! Nimbi Jaakɔb naantiibi kɔkɔ, ní tīī-u tinyool! Nimbi Isirayeel yab kɔkɔ, ní fàŋkì-u.

²⁵Di sá yii waa dū unandaan ki fá u-nandaŋku poon, kaa tí fātì u-kpaŋkpamboon ki tīī-u, ama unandaan yaa kúuǹ ki yíiń-uee, u pílifíǹ-u ní.

²⁶Samaa kɔkɔ kansikinee, m làá nyɔ̄ŋkì-si kun ní a ŋée pu. Bin tɔ́-si ki jáaḿ-see nimbiin ní m làá ŋá saraabi bin m nìn pōoǹ yii m làá ŋá kí tīī-see.

²⁷Unandaan làá jī ní kí díkí, bin nyàab̀ ti-Dindaanee làá nyɔ̄ŋkì-u. Unimbɔti ń tīī-ni mmaŋfafɔkɔn.

²⁸Atimbun ŋin kɔkɔ bí kitiŋ puee làá téetí ti-Dindaan pu ní kí fàtīí gítiń u-cee, ní anibul kɔkɔwoooo nib ń dāá gbàan̄ u-nimbiin kí jāam̀-u.

²⁹Di sá yii ti-Dindaan di yì dibeel, ní ki jīǹ atimbun kɔkɔ pu dibeel.

³⁰Kitiŋ pu gaajab làá jī kí díkí ní kí gbàan̄ u-nimbiin. Bin taaŋi jòon̄ ŋfal puee kɔkɔ làá gbàan̄ u-nimbiin, ki kpáaǹ un mun kaa ti làá ŋmátée.

³¹Bi-naantiibi làá dāá jāam̀-u, bi làá dāá sòoǹ ti-Dindaan pu kí tùkù bin dáá bíń ki dòońee.

³²Bi làá dāá māafì bin baa láá màl̄ee tin ti-Dindaan ŋá ki fīī u-nibee.