Read Ntcham Psaumes 25 Bible Online

Psaumes 25 - Ntcham bible

Psaumes 25

¹Daafiidi di ŋmàn̄ nlan nee. M-Dindaan, m fātì m-ba ki túĺ-si.

²M-Nimbɔtiu, sii pu ní m máká, taa yàntī icoo ń cúú-mi, kí taa yàntī m-nannanliibi ń já kí pɔ̄ɔkiǹ-mi.

³Á taa pée yàntī icoo ń cúú bin dū bi-mákal ki páaǹ a-puee. Ama icoo ń jī bin jáà nì see, bí gbíntí nì iŋaŋkulim.

⁴M-Dindaan, yàntī ḿ béé a-saŋŋu, dàkà-mi min a là ḿ nīn bée.

⁵Kpòotī-mi a-baamɔŋyi poon kí dàkà-mi. Di sá yii sii di sá Unimbɔti un fìil̄-mee, sii pu ní m máká baabadal.

⁶Ti-Dindaan, téetí yii doooo cannaaku ní a sá Unimbɔti un poon mɔ̄ ki cáá dineeŋkpaandee.

⁷Taa ti téetí m-yìntitam nì m-kpitii in m ŋá m-naacimpɔntinee pu. A-neeŋkpaandi nì a-ŋanti puee, á téetí m-pu, m-Dindaan.

⁸Ti-Dindaan ŋān̄ ní ki bí deedee, an pu ní u dàkà ukpitiŋal nsan ŋun u máaǹ kí dēe.

⁹U kpòotī bin sīntiǹ bi-ba taapuee bí nīn ŋáań tin bí deedeeyee, ní ki dàkà-bi u-saŋŋu.

¹⁰Tin kɔkɔ ti-Dindaan ŋáańee sá dineendi nì ibaamɔn ŋma ní ki tīī bin ŋúb́ u-poondi ki tɔ́ u-marabee.

¹¹Ti-Dindaan, a-yindi puee, dū m-kpitii kí pɔ̄-mi, di sá yii i wīikí tikpil.

¹²Unil yaa bí ní ki fàŋkí ti-Dindaanee, ti-Dindaan dàkà-u nsan ŋun u máaǹ kí nóóyee ní.

¹³An niliuee làá nīn bí mmɔnni, ní u-nibooliŋu ń dāá fōō kitiŋ kí nīn kíǹ ki yì[36].

¹⁴Bin fàŋkí ti-Dindaanee sá u-bɔɔbi ní, ní u yàntī bi béetí u-poondi.

¹⁵M-nimbikpeeŋu pée cɔ́ ti-Dindaan pu ní, di sá yii úǹ di nyāntí m-taaŋi kulaaŋŋu kun nìn sàl̄-mee poon.

¹⁶Fàtī a-nimbiin kí túĺ-mi kí sɔ̄ m-saai, m-Dindaan, kun puee m bí m-baba ki gbí falaa.

¹⁷Kunimbaau gbí m-pɔbilin, nyāntí-mi m-gìŋ́ŋi poon.

¹⁸Kpèè m-falaau nì m-nimbinaamandi, ní kí dū m-kpitii kɔkɔ kí pɔ̄-mi.

¹⁹Kpèè m-nannanliibi nín wīikí puee, bi ná-mi ní an kaa cáá bí lì.

²⁰Nín̄ wúń m-pu kí fīī-mi. Taa yàntī icoo ń jī-mi, di sá yii sii ní m sáǹ ki kɔ́.

²¹Tibulcin nì tin bí deedeeyee ń fīī-mi, kun puee m máká a-pu ní.

²²Unimbɔti, dā a-nib Isirayeel yab kí líí! Fīī-bi kí nyāntí bi-gìŋ́ŋi kɔkɔ poon.