Read Ntcham Psaumes 26 Bible Online

Psaumes 26 - Ntcham bible

Psaumes 26

¹Daafiidi di ŋmàn̄ nlan nee. M-Dindaan, sòoǹ kí pɔ̀-mi, di sá yii m ŋáań tin bí deedeeyee, ní m máká sii m-Dindaan pu kaa gùgufī.

²Cɔ̄ŋkì-mi, m-Dindaan, cɔ̄ŋkì-mi. Cɔ̄ŋkì m-landɔkɔi nì m-pɔbil.

³Di sá yii maa pée súntí a-neeŋkpaandi din a cáá m-puee pu, a-baamɔŋyi di kpòotī-mi.

⁴Man nì binyimɔndambi kaa kpáfí ki kàal̀, man nì mpoonnyoon dambi kaa cáá nnyɔɔpee.

⁵Maa là kí wāl̀ digaŋgam dambi kitil, ní kaa kàal̀ binikpitib cee.

⁶M-Dindaan, m fíntí m-ŋalii kí dàkà yii m sá maanyiiba, ki còom̄ ki màntī nsaraafan,

⁷ki gà ilan ki jáaḿ-si, ní ki sòoǹ atuŋkpaan ŋin kɔkɔ a ŋée pu.

⁸M-Dindaan, m néeń kí nīn bí a-diikun, laakin a lèekī a-nyooti ki dàkèe.

⁹Á taa nàan̄-mi kii a nín làá nàan̄ binikpitib puee, kí taa kpɔ̀-mi kii a nín làá kpɔ̀ binikpɔliibi puee.

¹⁰Bi bɔ́ntì kí tɔ̄ atuŋkpiti, ní tiwan tin bi làá dūú ŋéeb́ binib nyɔmmuee gbí bi-ŋaan.

¹¹Ama mamee, baa kāntí tikpitil tiba m-pu. Sɔ̄ m-saai ní kí fīī-mi.

¹²M còom̄ nsan ŋun cáá dimákalee pu. Laakin samaa yaa kpáfèe, niin ní m làá nyɔ̄ŋkì ti-Dindaan.