Read Ntcham Psaumes 27 Bible Online

Psaumes 27 - Ntcham bible

Psaumes 27

¹Daafiidi di ŋmàn̄ nlan nee. Ti-Dindaan di sá m-walifiŋu nì m-fiiliu, kin ŋma ní m làá gíti fàŋkì? Ti-Dindaan di wúń m-pu, kin ŋma di ŋūǹ kí fàaǹ-mi?

²Binikpitib yaa lúuń-mi kí cúú-mi kí tɔ̀ntēe, bíǹ m-nannanliibi nì bin kaa là kí wāl̀-mi gbantee di làá gbéetí ní kí lítí.

³Dijanjakitil yaa māntìi tú-mi, m-pɔbil kpá kí bīil̀. Báà m-nannanliibi yaa bíi jáà nì mi, m làá nīn gbíntìi máká ti-Dindaan pu.

⁴Kuwambambaantiiu ní m mēē ti-Dindaan, ní kuwambambaantiiu gbanti ní m pée là: ḿ nīn kóò ti-Dindaan diikun m-maŋfal wiiŋyi kɔkɔ poon, kí ŋmā kí nīn pée kpèé ti-Dindaan nyaaŋku, ní kí nyàab̀ kí béé-u u-kɔŋkooŋŋun.

⁵Dinimbinaamandi wiiŋŋuee, u làá dū-mi kí báĺ u-balilaŋkin. U làá dū-mi kí báĺ u-tantiu poon poon, ní kí dū-mi kí tɔ́kɔń ditaŋkpafɔkɔl pu yilpu yilpu.

⁶Niin ní m làá nīn kpèé m-nannanliibi bin māntìi tú-mee m-yil gáań. M làá fáá ŋwiliili kí ŋá saraabi u-tantiun, ní kí gāā ilan in mɔ̄ee kí nyɔ̄ŋkì ti-Dindaan.

⁷Ti-Dindaan, m yaa kūuntí ki yíì-see, á sɔ̄ m-saai kí kíí-mi.

⁸M dàkafī a nín lī puee yii: «Nyàab̀maan-mi!» Too m-Dindaan, m nyàab̀-si.

⁹Taa fàtī a-boon kí tīī-mi! Taa gbāfì man a-tɔntɔnliu nì diŋuul. Sii di sá m-jòońliu, taa yàntī-mi, taa dū-mi kí fá, Unimbɔti, m-fiiliu.

¹⁰Báà m-baa nì m-na yaa dū-mi ki fá, sii m-Dindaan làá fōō-mi[37].

¹¹M-Dindaan, dàkà-mi a-saŋŋu. M-nannanliibi puee, kpòotī-mi kí tàkan̄ nsammɔnti pu.

¹²Taa dū-mi kí líiǹ m-nannanliibi, di sá yii nnyimɔn seeradambi yíkìi jáà nì mi ki sòoǹ nì tininjati.

¹³M cáá dimákal yii m làá nīn bí kí ká ti-Dindaan ŋanti binifoobi tiŋkin.

¹⁴- Nín̄ máká ti-Dindaan pu. Pɔ́ɔǹ a-ba kí ká dipɔbil. Nín̄ máká ti-Dindaan pu.