Read Ntcham Psaumes 29 Bible Online

Psaumes 29 - Ntcham bible

Psaumes 29

¹Daafiidi di ŋmàn̄ nlan nee. Nimbi ituun, ní nyɔ̄ŋkìmaan ti-Dindaan, sòom̀maan u-nyooti nì u-pɔŋŋu pu.

²Nyɔ̄ŋkìmaan ti-Dindaan kí tīī u-yindi tinyool. Ní bòom̄maan ti-Dindaan nimbiin ŋyunti ŋun u yaa lēē u nín bí circir puee ki dàkēe.

³Bi gbìl̀ ti-Dindaan neen pu inyiŋfi pu. Unimbɔti tinyooldaan sòoǹ kii ditaadundee ní, ti-Dindaan cáá inyiŋfikpaan pu mpɔn.

⁴Ti-Dindaan yaa sòoǹee, u dàkà u-pɔŋŋu ní, ti-Dindaan yaa sòoǹee, u dàkà u-kpaanti ní.

⁵Ti-Dindaan yaa sòoǹee, seedir sufii kɔ́fí ní, ti-Dindaan kɔ́fí Leebanɔn seedir sufii.

⁶U yàntī Leebanɔn jool yùkufī kii dinajapɔmbilee, ní Eermɔn jool yùkufī kii kupɔɔun najapɔmbilee.

⁷Ti-Dindaan sòoǹ ní aŋmilimbil nyēē.

⁸Ti-Dindaan yaa sòoǹee, kuteeu cìŋkī ní, ti-Dindaan yàntī Kadeesi teeku cìŋkī.

⁹Ti-Dindaan yaa sòoǹee, seeni sufii cìŋkī ní[40], ní kubambaŋŋun sufii faati gbátí. Báà ŋma lì ti-Dindaan diikun yii: «Bí nyɔ̄ŋkì Unimbɔti.»

¹⁰Nnyiŋgbeen yuntiŋuee, ti-Dindaan nìn pée kā dibeel ní, ti-Dindaan sá ubɔti ní kí nīn cá jaanjaan.

¹¹Ti-Dindaan làá tīī u-nibul mpɔn, u làá bìin̄ u-nibul pu bí nīn bí ŋgbansɔŋfin.