Read Ntcham Psaumes 30 Bible Online

Psaumes 30 - Ntcham bible

Psaumes 30

¹Daafiidi di ŋmàn̄ nlan nee. Bi gāā-ŋu ki dū kunimbɔtidii ki sú Unimbɔti ní.

²M-Dindaan, m làá nyɔ̄ŋkì-si, di sá yii a fīī-mi, ní kaa yāntì m-nannanliibi ŋúb́-mi ki bèel̄ ki lāā.

³Ti-Dindaan m-Nimbɔtiu, m fáá mbiil á jòoń-mi ní a cáaǹ-mi.

⁴M-Dindaan, a nyántìń m-naŋki ditaŋkpiilin. M bàà sìntī dikaakulin, ama ní a fātìi tīī-mi dimaŋfal.

⁵Nimbi bin kɔkɔ sá ti-Dindaan nibee, ní gāāmaan ilan kí nyɔ̄ŋkì-u. Ní jāam̀maan-u kí lì yii u sá circirdaan.

⁶Ti-Dindaan ŋuul kaa súŋkí unil pu, ama u-ŋanti tíǹ pée bí u-pu ní kí tin sāā u-kúm dal. Kujoouee, an sá nsiim, ama kutaafaauee ní an sá mmɔn.

⁷Ŋyunti ŋun m nìn bí tiba kaa páb́-mee, m nìn lì yii: «Tiba pée kpá kí ŋá-mi.»

⁸A-ŋanti puee, m-Dindaan, a nìn wúń m-pu kii dijookpaandee. Ama a dāa fātì a-boon ki tīī-mee, ní dinyoondi kɔ́-mi.

⁹Ti-Dindaan, sii ní m kúuǹ ki yíiń, m gbāam̀ sii m-Dindaan ní.

¹⁰M yaa kpíìyaaa, m yaa nín sìntī ditaŋkpiilinaaa, ba ní a làá páatí? Bin kpíì ki kpántì ntamee gíti ŋūǹ kí nyɔ̄ŋkì-saaa? Bi gíti ŋūǹ kí sòoǹ a-deedeeu puɔɔɔ?

¹¹Pīlifì m-Dindaan, sɔ̄ m-saai, jòoń-mi, m-Dindaan!»

¹²A yāntì m-kpisilaŋyi kpántì ifaal ŋool. A lēē kutukub bin m pēēyee, ki dū dijiŋaabɔkutil ki pēeǹ-mi.

¹³An pu ní m làá nìn gà ilan ki nyɔ́ŋkí-si kí taa gbèen̄. M-Dindaan m-Nimbɔtiu, m làá nīn pée jáaḿ-si ní baabadal.