Read Ntcham Psaumes 31 Bible Online

Psaumes 31 - Ntcham bible

Psaumes 31

¹Daafiidi di ŋmàn̄ nlan nee ki tīī bilaŋgaaliibi kpiliu.

²M-Dindaan, sii ní m sáǹ ki kɔ́, taa yàntī icoo ń jī-mi dalba dalba! A nín sá deedeedaan puee, fīī-mi.

³Kpòon̄ a-tafal m-watil pú! Dāá fīī-mi malaa. Nín̄ sá m-taŋkpanaakooku, kibalilaŋ kin fìil̄-mee.

⁴Sii di sá m-taŋkpanaakooku nì m-balilaŋki. A-yindi puee, nín̄ dàkà-mi nsan kí nīn kpòotī-mi.

⁵Nyāntí-mi kulaaŋŋu kun bi píĺ-mee poon, di sá yii sii di sá m-balilaŋki.

⁶M dū m-ba ki ŋá a-ŋaan ní[41], fīī-mi ti-Dindaan, ibaamɔn Nimbɔtiu.

⁷M ná bin tòotī awaa ŋin kaa bí tibanee. Mamee, ti-Dindaan pu ní m máká.

⁸M làá nīn fàal̀ ní kí nīn bí mmɔnni a-ŋanti pu, di sá yii a ká m-falaau ní ki béè dinimbinaamandi din poon m bée.

⁹Aa dū-mi ki ŋá unannanli ŋaan. A yōoǹ-mi ki síiǹ m-taaŋi pu ní ki yāntì m tɔ́ m-ba.

¹⁰Sɔ̄ m-saai, ti-Dindaan, di sá yii m bí dinimbinaamandin. Kunimbaau ŋmɔ́ ki bíil̀ m-nimbiliŋ nì m-naŋki nì m-wunti kɔkɔ.

¹¹M-maŋfal wiiŋyi làá kúntí kunimbaau poon ní, abin ŋin kíǹ-mee làá kúntí diniindi digbál poon ní. M-kpitii puee, maa ti cáá mpɔn, an ŋmɔ́ ki bíil̀ m-kpabiŋ.

¹²M-nannanliibi sìí-mi, ní m-kɔŋkɔnaatɔb kìntī. Bin nyí-mee fàŋkí-mi. Bi yaa wál̀-mi m páaǹnée bi sáń-mi ní.

¹³Bi súntí m-pu kii unil un kpíìyee ní, m kpántì kii tiwan tin bi dūu fée ní.

¹⁴M gbìl̀ tibɔkpitil tin binib sòoǹ m-puee, dinyoondi māntìi tú-mi an kɔkɔ pu[42]. Bi kpáfì kinyɔkɔ m-pu, bi bɔ́ntì kí lēē m-maŋfal.

¹⁵Ama mamee, m máká sii ti-Dindaan pu ní. M lī yii: «Sii di sá m-Nimbɔtiu.»

¹⁶M-maŋfal wiiŋyi kɔkɔ bí a-ŋaan. Fīī-mi m-nannanliibi nì bin kā m-puee ŋaan.

¹⁷Dàkà man a-tɔntɔnliu a-laŋŋaŋfitiiku. A-neeŋkpaandi puee, fīī-mi.

¹⁸Ti-Dindaan, m yaa bíi kūuntí ki yíì-see, á taa yàntī icoo ń jī-mi! Ama á yàntī icoo ń cúú binikpitib, bí nīn ŋmí fɔ́ŋfɔŋ díkí diki ki sìntī ditaŋkpiilin.

¹⁹Yàntī binyimɔndambi gbanti ń kpántí bimɔɔmiimbi, bíǹ bilambidambi bin yòontí bi-ba yilpu, ki sòoǹ ki bíiĺ deedeedaanee.

²⁰Tiŋan tin a bɔ́ntì ki síiǹ bin fàŋkí-see wīikéeee! A ŋáań bin sáń ki kóò-see tiŋan gbanti binib kɔkɔ nimbiin ní.

²¹A cáá-bi ki bāal̀ laakin ní sii a-ba bée bí nīn dátiǹ tin binib bíi bɔ́ntí bi-puee. A cáá-bi ki bāal̀ a-balilaŋki bí nín dátiǹ binib siibiliŋ.

²²Tí nyɔ̄ŋkìmaan ti-Dindaan! Di sá yii u dàkā-mi u-neeŋkpaandi ŋyunti ŋun ní m-nannanliibi nìn māntìi tú-mi kii bijanjaliibi nín màntī kí tū kitiŋ kí já nì kì puee.

²³M-pɔbil nìn bíil̀ ní m lī yii: «A fātì a-boon ki tīī-mi dee!» Ama a gbìl̄ m-gbaamii pu ŋyunti ŋun m fáá mbiil ki yíiń-see.

²⁴Nín̄ néeḿmaan ti-Dindaan, nimbi bin sá u-yabee. Ti-Dindaan mɔ́tí bin fōō-u ki kííyee pu, ama ní ki dátí ulambidaan tafal min máaǹee.

²⁵Ní pɔ́ɔm̀maan ni-ba kí ká dipɔbil, nimbi bin kɔkɔ máká ti-Dindaan puee.