Read Ntcham Psaumes 33 Bible Online

Psaumes 33 - Ntcham bible

Psaumes 33

¹Deedeedambi, nín̄ fàal̀maan ti-Dindaan pu. An máaǹ bin pɔbil bí diba nì Unimbɔtee ń nyɔ̄ŋkì-u.

²Bɔ̀ɔ̀maan kubeeu kí jāam̀ ti-Dindaan, bɔ̀ɔ̀maan iŋmii saalaa beeku kí nyɔ̄ŋkì-u.

³Gāāmaan nlampɔɔn kí nyɔ̄ŋkì-u, bɔ̀ɔ̀maan tibɔɔkaal mmɔntiimin kí fáá ŋwiliili.

⁴Di sá yii ti-Dindaan bɔti tèen̄ ní, bi ŋūǹ kí nīn máká u-tuuŋŋi kɔkɔ pu.

⁵U néeń tin sá deedee nì mbaamɔnee. Ti-Dindaan ŋanti gbí kitiŋ kɔkɔ.

⁶Ti-Dindaan nyɔɔbundi ní u dūu náań kutagbɔŋu, ní ki sòon̄ ní tin kɔkɔ bí ku-puee nyáń.

⁷U kóoǹ amɔɔ nyim ki kpáfì dibɔɔbaantiil, ní ki cúú tiŋku nyiŋkpaammi ki kpáafì.

⁸Kitiŋ kɔkɔ nib ń fàŋkì ti-Dindaan, duulinya nib kɔkɔ ń nīn tɔ́-u.

⁹Úǹ di sòon̄ ní an ŋá u nín lī puee, úǹ di tīī mara ní tiwan kɔkɔ nyáń.

¹⁰Ti-Dindaan yāntì tin atimbun nib bàà bɔ́ntì kí ŋée ŋá fám. U kpītì tin bi bàà dākafì kí ŋée.

¹¹Tin ti-Dindaan bɔ́ntì kí ŋée bí ní kí nīn cá jaanjaan, ní tin u dākafì kí ŋée bí kí nīn cá abin abin.

¹²Ditimbundi din Nimbɔtiu sá ti-Dindaanee bí mmɔnneeee! Dinibul din u lēē dí nīn sá u-gaajawantee bí mmɔnni!

¹³Ti-Dindaan bíń doooo yilpu ní ki kpèé ki wāĺ binib kɔkɔ.

¹⁴U kāń u-beejal pu ní u-nimbil làaǹ bin kɔkɔ bí kitiŋ puee pu.

¹⁵Úǹ di náań bi-kɔkɔ pɔbil, u nyí tin bi ŋáańee kɔkɔ.

¹⁶An kaa sá ubɔti janjaliibi nín pɔ̄ɔ̄yee pu ní u kāntí dijajil, kaa tí sá ubaatandaan kpabil pu ní u jáà ki pɔ́ɔkíǹ u-nannanliu.

¹⁷Kujaau taamui kaa tìì dijajil, i-pɔŋkpaaŋŋu kaa fìil̄.

¹⁸Ama ti-Dindaan nimbil bá bin fàŋkí-uee, nì bin máká u-neeŋkpaandee pu.

¹⁹U fìil̄-bi ŋkúm ŋaan ní ki kpīintí-bi ŋkùm yuntiŋu.

²⁰Timbee, ti máká ti-Dindaan pu ní. Úǹ di tútúǹ-ti ní ki sá-ti digbampɔɔl.

²¹Úǹ di yì-tì ní ti cáá dipɔɔpindi, ní ti máká u-circir yindi pu.

²²Ti-Dindaan, yàntī a-neeŋkpaandi ń nīn bí ti-pu kii timbi nín máká a-pu puee.