Read Ntcham Psaumes 34 Bible Online

Psaumes 34 - Ntcham bible

Psaumes 34

¹Ŋyunti ŋun Daafiidi ŋá kii u sá ugbaan ubɔti Abimeeleeki nimbiin[44] úǹ jìn̄-u ki nyántì u búntèe ní u ŋmàn̄ nlan nee.

²M làá nyɔ̄ŋkì ti-Dindaan ŋyunti kamaa, u-nyɔŋkii làá nīn pée kā m-nyɔkɔn ní.

³Ti-Dindaan pu ní m làá nīn fàal̀. Bin sīntiǹ bi-ba taapuee ń pīlifì kí nīn fàal̀.

⁴Kūtìmaan m-pu tí lì yii u sá ukpaan. Càmaan dicilpuee tí yòon̄ u-yindi yilpu.

⁵M mēē ti-Dindaan ní u kíí-mi, u fīī-mi ki nyántì tin m fàŋkée kɔkɔ poon.

⁶Bin kpèé u-watil púee bí dipɔɔpindin, icoo pée gíti kpá kí jī-bi.

⁷Unandaan fáá mbiil ní ti-Dindaan gbìl̄, ní ki fīī-u ki nyántì u-gìŋ́ŋi kɔkɔ poon.

⁸Ti-Dindaan tuuŋyi māntìi tú bin fàŋkí-uee, ní ki fìil̄-bi.

⁹Ní dáań kí kpèè ti-Dindaan nín ŋān̄ puee[45]. Un sáǹ ki kɔ́-uee bí mmɔnneeee!

¹⁰Ní fàŋkìmaan ti-Dindaan, nimbi bin sá u-yabee, di sá yii tiba kaa lóotí bin fàŋkí-uee.

¹¹Tijin ŋūǹ kí lóó digbikintipɔmbil ŋkùm ń cúú-dì, ama tiba kaa lóotí bin nyàab̀ ti-Dindaanee.

¹²M-biyaamu, dāam̄maan kí pīlifì-mi, m làá dàkà-ni ní nīn fàŋkí ti-Dindaan.

¹³A là kí nīn bí dimaŋfalinaaa? A là mmaŋfafɔkɔn kí nīn bí mmɔnnaaa?

¹⁴Cúú a-limbil kí taa sòoǹ tibɔkpitil, kí ŋúb́ a-nyɔkɔ kí taa mɔ̄ntì.

¹⁵Fàtī a-boon kí tīī ikpiti, kí ŋá tiŋan, nyàab̀ ŋgbansɔŋfi kí nīn ŋúb́ an píkí.

¹⁶Ti-Dindaan nimbil làaǹ deedeedambi pu, ní u-tafal gbàkā ki pílifí bi-biilii.

¹⁷Ama ti-Dindaan kaa gèetíǹ bikpitiŋaliibi[46], u làá kpìtī bi-yiŋŋi kitiŋ pu.

¹⁸Deedeedambi yaa gbáń ibiil ki yíiń ti-Dindaanee, u gbìl̀ ní ki nyāntí-bi bi-gìŋ́ŋi kɔkɔ poon.

¹⁹Ti-Dindaan bí ki pìlīǹ bin pɔbiliŋ bíil̀ee, ní ki fìil̄ bin kaa ti cáá dimákalee[47].

²⁰Deedeedaan kóò agìń tikpil poon, ama ti-Dindaan di nyāntí-u ŋi-kɔkɔ poon.

²¹Ti-Dindaan wúń u-kpabiŋ kɔkɔ pu, báà dibaba kaa wīī[48].

²²Unikpiti kpitii di làá kpɔ̀-u, Unimbɔti làá dáaĺ bin ná deedeedambee tafal.

²³Ti-Dindaan fìil̄ u-tɔntɔnliibi, dibɔkpil diba kaa ti dɔ̄ ki cí bin sáǹ ki kɔ́-uee.