Read Ntcham Psaumes 35 Bible Online

Psaumes 35 - Ntcham bible

Psaumes 35

¹Daafiidi di ŋmàn̄ nlan nee. Ti-Dindaan, nín̄ ná bin ná-mee, kí já nì bin jáà nì mee.

²Yòon̄ agbampɔɔ kiwaai nì dikpaandi, kí dāan̄ kí jòoń-mi.

³Yòon̄ kikpaŋ nì kicɔkɔ kí kíntí bin bíi jì-mee. Tùkù-mi yii: «Man di làá fīī-si».

⁴Bin nyàab̀ kí kpɔ̀-mee, yàntī icoo ń cúú-bi bí fá bi-jilimau! Bin dàkafī m-pu tikpitilee, yàntī bí tūlifì bi-boon nì icoo.

⁵Yàntī ti-Dindaan tuuŋŋu yaa bīī bi-boon ki jì-bee, bí nīn bí kii tifeel tin kubuŋu yòontí ki féeńee.

⁶Ti-Dindaan tuuŋŋu yaa bíi jì-bee, bi-saŋŋu ń kpántí dibɔmbɔndi nì dijɔnjɔndi.

⁷Maa ŋá tiba ní bi gbìn̄ mbòó ki dū kulaaŋŋu ki píĺ yilpu, maa ŋá tiba ní bi gbìn̄ mbòó m-pu.

⁸Yàntī nnaabukpaan ŋubɔ ń jēetí bi-pu dicilpu dicilpu! Yàntī kulaaŋŋu kun bi píĺee ń fàtīí sàl̄-bi, ní nnaabukpaanee ń nàan̄-bi.

⁹Niinee m làá dāá fàal̀ ti-Dindaan pu, án làá dāá nīn mɔ̄ǹ-mi, kun puee u fīī-mi.

¹⁰M làá lì nì m-pɔbil kɔkɔ yii: «Ti-Dindaan, ŋma di bí kii sisee? Sii un fìil̄ uwɔfi un pɔ̄ɔǹ-uee ŋaan, ní ki fìil̄ unandaan nì ufalaadaan un mùul̄-uee ŋaanee.»

¹¹Nnyimɔn seeradambi yíkìi kāl̀ m-pu ki bàlifī-mi tibɔti tin pu maa kpáàa nyée.

¹²M yaa ŋá-bi tiŋanee, tikpitil ní bi dù kí téeǹ-mi, bi-kɔkɔ dū-mi ki fá.

¹³Bi nín nìn būǹee, m nìn dū kutuku ní ki pēeǹ kí dàkà m-nimbaaku. M nìn bōob̀ kinyɔkɔ ní ki mèé kaa gbèentí,

¹⁴a lì kii m-bɔɔ àá m-nabiki yaa būǹ m nín ŋáań puee. M nìn còom̄ ní ki tīī ní ki sūǹ kii m-na di kpíìyee.

¹⁵Ama ŋyunti ŋun m lítèe, bíǹ māntìi tú-mi ní ki fàal̀. Bi māntìi tú-mi kí já nì mi. Binicambi bin maa nyée kúŋfí m-boon kaa gbèentí.

¹⁶Bi bèel̄-mi ní kaa gbèentí, ní ki gbìitī bi-nyiŋŋi m-pu.

¹⁷Ti-Dindaan, a làá nīn kā ki kpèé kí cáá sāā ŋyunti ŋulɔŋu ní? Fīī-mi kí nyāntí dinimbinaamandi nee poon, kí nyāntí agbikintipɔmbil nee ŋaan.

¹⁸M làá jāam̀-si samaa kansikin, diniwul kansikinee, m làá nyɔ̄ŋkì-si.

¹⁹Taa yàntī bin ná-mi fámee ń nīn fàal̀ m-pu. Taa yàntī bin kaa là kí wāl̀-mee ń nīn kábití tɔb ki lāā[49].

²⁰Di sá yii baa sòoǹ nì unil ŋgbansɔŋfi poon, ama bi kúŋfí binib bin bí ŋgbansɔŋfin kitiŋ nee puee boon ní.

²¹Bi wāaǹ bi-nyɔmmu bàaa m-pu ki lī yii: «Ti-nimbil baasii ká-u ní!»

²²Ama sii ti-Dindaan ká tin jítèe, taa nín̄ kā ki ŋmí. Ti-Dindaan, taa nín̄ dátiǹ-mi.

²³Yīkì kí sòoǹ kí pɔ̀-mi, m-Nimbɔtiu, yīkì kí mɔ̄tì m-pu, m-Dindaan.

²⁴A-deedeeu puee, pɔ̀-mi ti-Dindaan, m-Nimbɔtiu, taa yàntī bí nīn fàal̀ m-pu.

²⁵Taa yàntī bí lì bi-pɔbilin yii: «Toooo! ti nín là puee sèé,» kí taa yàntī bí lì yii: «Ti dū-u ki náĺ.»

²⁶Yàntī icoo ń cúú bin kɔkɔ fàal̀ m-nimbinaamandi poonee! Yàntī icoo ń kɔ́ bin dàkafī yii bi jítiǹ-mee bí fá bi-jilimau.

²⁷Ama yàntī bin là kí ká yii bi pɔ̀n̄-mee ń nīn bí mmɔn nì dipɔɔpindin. Yàntī bí nīn lì ki bùsī yii: «Ti-Dindaan sá ukpaan. An mɔ̄ǹ-u ú ŋá u-tɔntɔnliu tiŋan.»

²⁸M làá nīn sòoǹ a-deedeeu pu, ní kí nīn nyɔ́ŋkí-si baabadal.