Read Ntcham Psaumes 36 Bible Online

Psaumes 36 - Ntcham bible

Psaumes 36

¹Ti-Dindaan tɔntɔnliu Daafiidi di ŋmàn̄ nlan nee ki tīī bilaŋgaaliibi kpiliu.

²M téetí ukpitiŋal nyɔɔbuŋkpitiŋ pu, úǹ ceeyee, á nīn fàŋkí Unimbɔtee kaa cáá taapu.

³Di sá yii u cáǹ u-ba ŋkpaamin, an puee waa ŋūǹ kí ká ikpiti iba u-ni kí nīn ná-i.

⁴Ikpiti nì inyimɔn nyɔɔbuŋŋi ŋma di nyēē u-nyɔkɔn, waa ti nyí tin bi yíì tiŋan diŋálee.

⁵U yaa dɔ̄ u-dooŋu puee, tibɔkpitil ŋma ní u dàkafī. U tàkā nsaŋkpiti pu, waa yíití ikpiti.

⁶Ti-Dindaan, a-neeŋkpaandi tin bàn̄ kutagbɔŋu, a-baamɔŋyi tin tūū atagban.

⁷A-deedeeu fɔ̀kɔ̀ ki jítì ajoofɔkɔ pu, ní a nín sòoǹ binib bɔti nì ibaamɔn puee nyóò kii nnyimbuuŋkpaanee. Ti-Dindaan, a fìil̄ binib nì tiwaŋkuti.

⁸Unimbɔti, a-neeŋkpaandi cáá kunyampooueeee! Binib sáń ki kóò a-feeŋyi booŋŋu taapu.

⁹A gbēentí-bi a-diikun gaajawanti, ní ki yàntī bi nyù a-ŋanti tin pùub̀ kii mbunee.

¹⁰Sii di tīī tiwan tin kɔkɔ bée dimaŋfal, a-walfiŋun ní ti kāntí ŋwalifi.

¹¹Nín̄ gbíntìi nìkì ki néeń bin nyí-see, ní kí nīn ŋáań bin pɔbiliŋ bí diba nì see tiŋan.

¹²Taa yàntī ulambidaan ń kɔ́nní m-pu, kí taa yàntī unikpiti ń jà-mi ḿ sāǹ.

¹³Kpèè, bin ŋáań ikpitee lítì. Bíǹ di dɔ̄ kaa ti ŋūǹ kí yīkèe.