Read Ntcham Psaumes 37 Bible Online

Psaumes 37 - Ntcham bible

Psaumes 37

¹Daafiidi di ŋmàn̄ nlan nee. Taa gíí binikpitib pu diŋuul, taa nín̄ cáá bikpitiŋaliibi pu nnimbitaataam.

²Di sá yii an kaa làá sūŋkì bi làá yɔ́ĺ kii timoolee, bi làá kpā kii timɔsɔn nín kōō puee.

³Nín̄ máká ti-Dindaan pu kí nīn ŋáań tiŋan, mimmee a làá kàl̄ kitiŋ nee pu nì ŋgbansɔŋfi.

⁴An nīn mɔ̄ǹ-si ti-Dindaan pu, ní ú tīī-si kun a-pɔbil fáatèe.

⁵Dū a-bɔti kɔkɔ kí ŋá ti-Dindaan ŋaan, nín̄ máká u-pu, u làá ŋá kí tīī-si.

⁶U làá yàntī a-deedeeu ń nyā kí páań kii ŋwiinee, ní binib ń ká a-baamɔŋyi kuwiŋkaŋu pu.

⁷Ŋmīĺ fɔ́ŋfɔŋ ti-Dindaan nimbiin kí nīn máká u-pu. Taa gíí unil un an bútèe nì un mùul̀ee pu diŋuul.

⁸Yàntī diŋuul, fá mbum. Taa gíí diŋuul, án làá yàntī á ŋá ikpiti.

⁹Di sá yii Unimbɔti làá kpɔ̀ kí céetí bikpitiŋaliibi, ama bin máká ti-Dindaan puee di làá fōō kitiŋ kin u pōoǹ-bee kí nīn kíǹ ki yì.

¹⁰An kíǹ fiii unikpiti kaa ti làá nīn bí. A làá dāá nyàab̀ laakin u nìn bée, ama kaa làá ti ká-u.

¹¹Ama bin sīntiǹ bi-ba taapuee làá dāá fōō kitiŋ kí nīn kíǹ ki yì[50], ní kí nīn bí ŋgbansɔŋfin mmɔm.

¹²Unikpiti dàkafī deedeedaan pu tibɔkpitil ní ki gbìitī u-pu anyin.

¹³Ama ní ti-Dindaan lāā-u, di sá yii ŋwiin ŋun u làá dáaĺ u-tafalee tóobiń.

¹⁴Binikpitib dáaĺ ki fɔ́fì ntàataajimu ki píĺ bi-tɔfii kí kpɔ̀ unandaan nì ufalaadaan, kí làntì bin ŋáań tin bí deedeeyee.

¹⁵Ama bíǹ bi-ba jimmu di làá fàtīí sāā bi-pɔbiliŋ, ní bi-tɔfii ń kɔ̄fì.

¹⁶Fiii un deedeedaan cááyee sɔ́ǹ tigaajati tin binikpitib tikpil cááyee.

¹⁷Di sá yii binikpitib pɔŋŋu làá nàan̄, ama ti-Dindaan di tíkí deedeedambi.

¹⁸Ti-Dindaan di nyí bin sí nì u deedeeyee wiiŋyi, ní kitiŋ kin bi fōō difakalee làá nīn bí ki cá talku.

¹⁹Dinimbinaamandi yuntiŋuee, icoo kaa làá jī-bi, ŋkùm mun yuntiŋuee, bi làá ká kí jī kí díkí.

²⁰Tiŋman, binikpitib làá kpú kí céetí, ti-Dindaan nannanliibi làá nīn bí kii kumooun supumpukumee ní. Bi làá wāŋkì, bi làá wāŋkì kii nnyiimee.

²¹Unikpiti pìntí ní kaa tēentí, ama deedeedaan úǹ poon mɔ̄ ní u tìì.

²²Bin boon ti-Dindaan bīiǹee di dāa yì kitiŋ, ama u làá dāá kúntí bin u tɔ́ mbusuee.

²³Unil un bimbim fáatiǹ ti-Dindaanee, u yàntī udaan còom̄ ní kaa fàŋkí tiba.

²⁴Báà udaan yaa gbéetì, waa làá lítí, di sá yii ti-Dindaan ŋúb́ u-ŋal.

²⁵M nìn sá unaacimpɔɔn ní kɔŋkɔnnee ki púĺ, ama maa láá pée ká ti-Dindaan dū deedeedaan ki fá, àá udaan biyaamu bí ki mèé tijin ki jīǹ.

²⁶Baabadalee, úǹ sūǹ binib saai ní ki pìntí, ní u-biyaamu sá dibiindi.

²⁷Fàtī a-boon kí tīī ikpiti kí ŋá tiŋan, ní kí kàl̄ kitiŋ nee pu kí nīn cá jaanjaan.

²⁸Di sá yii ti-Dindaan néeń bí nīn sòoǹ binib bɔti nì ibaamɔn, ní kaa féeń bin sí nì u deedeeyee. U cí-bi ní baabadal, ama u làá kúntí binikpitib nibooliŋu.

²⁹Deedeedambi làá dāá fōō kitiŋ kí nīn yì, ní kí kàl̄ ki-pu kí nīn cá jaanjaan.

³⁰Deedeedaan nyɔkɔn ní iciin nyɔɔbuŋŋi nyēē, ní u-limbil sòoǹ binib bɔti nì ibaamɔn.

³¹Unimbɔti marab kā u-pɔbilin, u kpá kí tāā kí pántí.

³²Binikpitib cɔ́ŋkí deedeedaan, ní ki nyàab̀ kí kpɔ̀-u.

³³Ama ti-Dindaan kaa làá dū-u kí ŋá bi-ŋaan. Bi yaa tí bíi sòoǹ u-bɔtaaa, waa làá yàntī bí kpɔ̀ u-bɔti.

³⁴Nín̄ máká ti-Dindaan pu kí nīn nóó u-saŋŋu. U làá yòon̄-si yilpu á fōō kitiŋ nee kí nīn kíǹ ki yì, ní kí ká u nín làá kúntí unikpiti puee.

³⁵M ká unikpiti ubɔ cáá u-pɔŋŋu ki fàantí binib, u nìn wíiǹ kii busukpaambuee ní.

³⁶Ama m jítì niinee, waa ti bí. M nyàab̄-u, ama maa ti ká-u.

³⁷Dáań ubulcindaan, kpèè deedeedaan. An niliuee kúntí ŋgbansɔŋfin ní.

³⁸Ama Unimbɔti làá kúntí pɔɔgaatib dicilpu, ní kí kpɔ̀ kí céetí binikpitib naantiibi.

³⁹Deedeedambi fiil nyēeń ti-Dindaan cee ní. Dinimbinaamandi yuntiŋuee, úǹ ní bi sáń ki kóò.

⁴⁰Ti-Dindaan di tútúǹ-bi ní ki jòoń-bi. U nyāntí-bi binikpitib ŋaan ní ki fìil̄-bi, kun puee bi sáǹ ki kɔ́-u.