Read Ntcham Psaumes 38 Bible Online

Psaumes 38 - Ntcham bible

Psaumes 38

¹Daafiidi di ŋmàn̄ nlan nee kí nīn téetí Unimbɔti pu.

²Ti-Dindaan, taa wòoǹ-mi nì diŋuul, taa dū mbum kí dáaĺ m-tafal.

³A dū a-piiŋyi ki yá-mi, ní ki dū a-ŋal ki fáá-mi ki lúkú.

⁴A-ŋuul puee m-wunti kaa ti pɔ̄ɔ̄, m-kpitii puee m-kpabiŋ kaa ti pɔ̄ɔ̄.

⁵Di sá yii m-kpitii kpúkú ki jítì m-yil pu, i nyìm̀ m-pu kii diwaŋgul din nyìm̀ee ní.

⁶M-gbaandi puee, m-buuŋyi sūū ki núù.

⁷M-weeŋyi nyīī-mi ki bōoǹ taapu taapu, baabadalee m còom̄ kunimbaaun ní.

⁸Di sá yii m-wunti píl̀ kpaŋkpam, ní m-wunti kaa ti pɔ̄ɔ̄ báà fiii.

⁹Maa ti cáá mpɔn ní an nùkū-mi púsi pusi. M-pɔbil kɔ́ kunimbaaun ní m yáliŋkí.

¹⁰M-Dindaan, kun m lèe dɔ̄ a-nimbiin, a nyí m-yaliŋkii.

¹¹M-pɔbil máfí, mpɔn kaa ti bí-mi, m-nimbiliŋ gba kaa ti wāĺ tiŋan.

¹²M-bɔɔbi nì man nì bin nōotée kíǹ ki sáń-mi m-buuŋyi pu. M-dicaŋkun yab gba kaa ti là kí sútí kí pìl̄-mi.

¹³Bin là kí kpɔ̀-mee pīil̀-mi titalindi. Bin nyàab̀-mi tikpitilee sòoǹ ki mɔ̀tīi púntí-mi, ní ki cáá m-pu disambiil baabadal.

¹⁴Ama mamee, m kpántì kii utafakpaafuee ní, maa gbìl̀ tiba. M kpántì kii umuunee ní, maa gàtī tiba.

¹⁵Tiŋman m kpántì kii unil un kaa gbìl̀ee ní, unil un kaa cáá kinyɔkɔ kí gàtī tibee.

¹⁶Ama sii pu ní m máká, ti-Dindaan, sii ti-Dindaan m-Nimbɔtiu di làá kíí.

¹⁷Di sá m mēē yii: «M yaa gbéetìi lítèe, á taa yàntī bí nīn fàal̀ kí jī m-pu dinyandi».

¹⁸Too man di làá lítée, ní m-wàlifii dáá gbíntìi bí m-ni.

¹⁹M bīitì m-yìntitam pu, m-kpitii fàantí-mi.

²⁰M-nannanliibi cáá laafiya ki cáá mpɔn, bin ná-mi an kaa cáá taapuee wīikí tikpil.

²¹Bi cáá ikpiti ki pà tiŋan tin m ŋáań-bee, kun puee bi wòoǹ-mi yii m pá tiŋan boon.

²²Ti-Dindaan, taa dū-mi kí fá, m-Nimbɔtiu, taa nín̄ dátiǹ-mi.

²³Ŋá malaa kí dāá jòoń-mi, ti-Dindaan, m-fiiliu.