Read Ntcham Psaumes 39 Bible Online

Psaumes 39 - Ntcham bible

Psaumes 39

¹Daafiidi di ŋmàn̄ nlan nee ki tīī bilaŋgaaliibi kpiliu Jeedutun.

²M nìn lī yii: «M làá nīn nyíǹ m-ba m-bimbim poon kí taa sòoǹ tiba kí ŋá ikpiti. M làá táb́ m-nyɔkɔ kí taa lì tiba ŋyunti ŋun ní binikpitib bí ki kɔ́ĺ-mee.»

³M táb́ m-nyɔkɔ ní ki ŋmí, m yíì kaa pée sòon̄ tiba. Ama ní m-wàlifii mɔ̀tīi kútí,

⁴ní m-pɔbil píĺ kpaŋkpam m-poon. An gíti lákatì ki kíǹ ki sèetī-mi kii ŋŋmee ní m dāa wāaǹ m-nyɔkɔ ki sòon̄.

⁵Ti-Dindaan, yàntī ḿ béé m-maŋfal wiiŋyi nín làá kúntí puee, yàntī ḿ béé iwiin in kíǹ-mi ḿ dūú kàl̄ kitiŋ nee puee, kí yàntī ḿ béé m-maŋfal wiiŋyi nín kaa pée náaǹ puee.

⁶Kpèè, iwiin in a tīī-mi ḿ dūú kàl̄ kitiŋ puee bí kii diŋaantil waaŋŋuee ní. M-maŋfal wiiŋyi kaa pée sá a-cee tiba. Tiŋman, unifoo kamaa bí kii kubuŋuee ní.

⁷Tiŋman, unil cá ní ki gítiń kii kujiliŋuee! U nín pée bìǹ ki nyàab̀ tin kɔkɔee sá kubuŋu ní. U nyàab̀ tigaajati ki kpūkuntí, ama waa nyí un làá dāá jī-tèe.

⁸Mimmee, m-Dindaan, ba ní ḿ nīn gíti kā ki cí? M máká sii pu ní.

⁹Fīī-mi kí nyāntí m-kpitii kɔkɔn, taa yàntī bigbaambi ń lā-mi.

¹⁰M táb́ m-nyɔkɔ, maa ti làá wàan̄-kì, di sá yii sii di yāntì m bí falaa nee poon[51].

¹¹Gbèen̄ kí taa ti fáá-mi, a-ŋaŋkuliŋ làá yàntī ḿ kpú dee.

¹²A wòoǹ unil ní ki dátí u-tafal u-kpitii pu. Kii dikoosibil nín ŋmóò disubil puee, míǹ ní a bíiĺ tin udaan néeńee. Tiŋman, unil sá ba, an yaa kaa sá kubuŋu.

¹³Ti-Dindaan, pīlifì m-wimmeem nì m-biilii, kpòon̄ a-tafal kí pīlifì m-siim. Di sá yii m sá unikɔkaa ní a-cee, m sá unicaan ní kii m-naanjab kɔkɔ nín nìn sá puee.

¹⁴Yàntī ḿ ŋùŋfì fiii kí ká tilaal kí wàatī ní ḿ búntí kí kpántí un kpá nee.