Read Ntcham Psaumes 40 Bible Online

Psaumes 40 - Ntcham bible

Psaumes 40

¹Daafiidi di ŋmàn̄ nlan nee ki tīī bilaŋgaaliibi kpiliu.

²M dū m-mákal kɔkɔ ki páaǹ ti-Dindaan pu, ní u tīntìń ki pílifì m-biilii.

³U dáaĺ-mi ki nyántì ŋkúm booŋŋun, u dáaĺ-mi ki nyántì tikpati tin nyóòyee poon. U yáatì-mi ki tɔ́kɔǹ ditaŋkpal pu, m yaa còom̄ee maa ti fàŋkí.

⁴U dū nlampɔɔn ki ŋá m-nyɔkɔn ḿ gāā kí nyɔ̄ŋkì úǹ ti-Nimbɔtiu. Binib tikpil làá ká ní kí fàŋkì, ní kí nīn kíǹ ki máká ti-Dindaan pu.

⁵Unil un máká ti-Dindaan pu, kaa fàtī bilambidambi binyimɔndambee puee bí mmɔnneeee!

⁶Ti-Dindaan m-Nimbɔtiu, a-maamaaci tuuŋŋi ŋin a ŋá ki tīī-mee wīikéeee! Aa cáá juti. A bɔ́ntì tiwan tikpil kí tīī-ti. Maa làá ŋmā kí sòoǹ tin kɔkɔ a ŋée, kun puee tì wīikí tikpil.

⁷An kaa sá kuwaŋkuluu saraau àá tijimpin saraau ní a là[52], kaa tí sá saraawɔkaa àá ikpiti pɔ̄tam saraau ní a bàlifī. Ama a tīī-mi atafal ḿ pīlifiǹ-si.

⁸An pu ní m bí yii: «M sèé, m dòoń a-cee. Kugbɔŋu poonee bi ŋmàn̄ tin m máaǹ kí ŋée.»

⁹M-Nimbɔtiu, an mɔ̄ǹ-mi ḿ ŋá min fáatiǹ-see, m kpáafí a-marab m-pɔbilin.

¹⁰Samaa kpafikpaandi poonee, m sòon̄ a-deedeeu pu. Kpèè maa ŋūǹ kí ŋmèè kí taa sòoǹ, ti-Dindaan, sii a-ba nyí míǹ.

¹¹Maa dū a-deedeeu ki bál̀ m-pɔbilin, m sòon̄ a-baamɔŋyi nì a-fiil pu. Maa dū a-neeŋkpaandi nì a-baamɔŋyi ki bál̀ samaa kpafikpaandi poon.

¹²M-Dindaan, á taa kàkatī a-poommɔŋŋu kí wàatī-mi, yàntī a-neeŋkpaandi nì a-baamɔŋyi ń nīn pée wúń m-pu.

¹³Agìń tikpil lúuń-mi ajan kɔkɔ pu, m-kpitii māntìi gíb́-mi ní maa ti wāĺ. I wīikí ki jítiǹ m-yikpiti, ní m-wunti yɔ̄tì.

¹⁴Ti-Dindaan, m gbàam̄-si, fīī-mi! Ti-Dindaan, dāá jòoń-mi malaa.

¹⁵Bin nyàab̀ kí lēē m-maŋfalee, kɔ́ǹ bi-kɔkɔ icoo dicilpu! Bin m yaa bí agìń poon an mɔ̄ǹ-bee, yàntī bí sāǹ kí fá bi-nyooti!

¹⁶Nàan̄ bin bèel̄-mi ki lāāyee, bi-cooi ń nīn dī-bi!

¹⁷Ama yàntī bin kɔkɔ nyàab̀-see ń nīn bí mmɔnni ki fàal̀. Yàntī bin néeń sii, ufiilee ń nīn pée lì yii: «Ti-Dindaan sá ukpaaneeee!»

¹⁸Mamee, m sá ufalaadaan nì unandaan ní. Ti-Dindaan, taa súntí m-pu. Sii di sá m-jòońliu nì m-fiiliu, m-Nimbɔtiu, taa tàan̄.