Read Ntcham Psaumes 41 Bible Online

Psaumes 41 - Ntcham bible

Psaumes 41

¹Daafiidi di ŋmàn̄ nlan nee ki tīī bilaŋgaaliibi kpiliu.

²Unil un dàkafī ufalaadaan puee bí mmɔnneeee! Digìńdi wiiŋŋu dalee, ti-Dindaan làá fīī-u.

³Ti-Dindaan làá wúń u-pu ní kí tīī-u dimaŋfal. U làá yàntī ú nīn bí mmɔnni kitiŋ pu. Waa làá dū-u kí ŋá u-nannanliibi ŋaan.

⁴U yaa dɔ̄ mbunlidoo pu, ti-Dindaan làá tíkiń-u. U làá cúú mbunlidooyee kí kpántí ŋgbampɔn dooŋu.

⁵Mamee, m lī yii: «Ti-Dindaan, sɔ̄ m-saai kí cáaǹ-mi, di sá yii m yīntiǹ-si.»

⁶M-nannanliibi sòoǹ m-pu tibɔkpitil ki lì yii: «Ba dal ní u làá kpú bí súntí u-pu ní?»

⁷Bi-kansikin ubɔ yaa dɔ́miń kí màntì m-puee, u dàkafī m-pu tibɔkpitil ŋma ní. U kpáafí tibɔkpitil u-pɔbilin, ní u yaa nyáń mmɔŋkee, u cáa sòoǹ.

⁸Bin kɔkɔ ná-mee cáá m-bɔti ki lɔ́kɔfí ki tùkù tɔb, bi dàkafī m-pu tin kaa pée ŋān̄ee ŋma ní.

⁹Bi lì yii: «An sá kuweeŋkpiiu kubɔ di cúú-u. Laakin u dɔ̄ nee, waa ti làá ŋmā kí yīkì.»

¹⁰Áli gba m-bɔɔmɔnti un pu m máká u jīǹ m-jintee fātìi bíi jáà nì mi[53].

¹¹Ama sii m-Dindaan, sɔ̄ m-saai kí fàtīí tīī-mi ŋgbampɔn, ḿ tɔ̀ m-nannanliibi ipɔntoon.

¹²Kun m dūu béè yii m fáatiǹ-see di sá m-nannanliibi kaa jíń m-pu dinyandi.

¹³A tútuǹ-mi ki cáaǹ-mi, ní ki yāntì m bí a-nimbiin kí nīn cá jaanjaan.

¹⁴Tí nyɔ̄ŋkì ti-Dindaan, Isirayeel Nimbɔtiu! Tí nyɔ̄ŋkì-u kɔŋkɔnnee kí nīn cá jaanjaan! Ameeni, án lafun ŋá míǹ!