Read Ntcham Psaumes 42 Bible Online

Psaumes 42 - Ntcham bible

Psaumes 42

¹Koora dicaŋkun yab di ŋmàn̄ nlan nee ki tīī bilaŋgaaliibi kpiliu.

²Kii upeeman di tíkì ki fèefī ki nyàab̀ mbun nyim puee, míǹ ní ma mun tíkì ki fèefī ki nyàab̀-si, Unimbɔti.

³Kii nnyinnyoo nín cútí unil u nyàab̀ nnyim puee, míǹ ní m nyàab̀ sii dimaŋfal Nimbɔtiu. Ba dal ní m làá ŋmā kí kɔ́ kunimbɔtidiin, kí yūĺ Unimbɔti nimbiin ní?

⁴M-nyinnyim di kpántì m-jinti ŋwiimpu nì kunyeeu, di sá yii bi bàlifī-mi kaa gbèentí yii: «A-Nimbɔtiuee baasii bí la ní?»

⁵Niinee ní án kɔ́ m-pɔbilin ní ḿ téetí dooooyee pu, ŋyunti ŋun samaa yaa nìn bí jiŋaal poon, m līī bi-nyɔkɔpu tí tin kɔ́ kunimbɔtidiin, ki gà ilan ki nyɔ́ŋkí Unimbɔti nì ifaalee.

⁶«Ba pu ní m bí kunimbaaun míǹ? Ba pu ní m yáliŋkí nì m-ba míǹ?» M làá nīn máká Unimbɔti pu. Tiŋman m làá nīn bí ki nyɔ́ŋkí-u, úǹ di sá m-fiiliu nì m-Nimbɔtiu.

⁷M-Nimbɔtiu, m-pɔbil bíil̀, an pu ní m téetì a-pu doooo dimɔɔl Jɔɔdan tiŋkin nì Eermɔn nì Miiseeyaar jooŋŋi yilpu.

⁸A yàntī inyiŋfi sìtī ki gà kuwoou, ní tinyiŋgban tiba cāabìń ti-juti. Tì nín lítí ki pùub̀ puee, tì dòoń ki bìintí m-pu.

⁹Ŋwiimpuee, ti-Dindaan dàkà-mi u-neeŋkpaandi, ní kunyeeuee, m gà ilan ki nyɔ́ŋkí-u, ki mèé Unimbɔti un tìì-mi dimaŋfalee.

¹⁰M tùkū Unimbɔti un sá m-taŋkpanaakookuee yii: «Ba pu ní a súntì m-pu? Ba pu ní ḿ nīn bí kunimbaaun m-nannanliibi wɔ́b́-mi?»

¹¹M-nannanliibi ŋá-mi tiweendi ki tin bàn̄ m-kpabiŋ. Bi sìí-mi ní ki bàlifī-mi baabadal yii: «A-Nimbɔtiuee bí la?»

¹²«Ba pu ní m bí kunimbaaun míǹ, ba pu ní m yáliŋkí nì m-ba míǹ?» M làá nīn máká Unimbɔti pu. Tiŋman m làá nīn bí ki nyɔ́ŋkí-u, úǹ di sá m-fiiliu nì m-Nimbɔtiu.