Read Ntcham Psaumes 44 Bible Online

Psaumes 44 - Ntcham bible

Psaumes 44

¹Koora dicaŋkun yab di ŋmàn̄ nlan nee ki tīī bilaŋgaaliibi kpiliu.

²Unimbɔti, ti-tafal gbìl̄ ní ti-baabi mun máafì-ti atuŋkpaan ŋin ní a nìn ŋá bi-yuntiŋu, iyunti in jítèe poonee.

³A nìn dū a-pɔŋkpaaŋŋu ki jìn̄ atimbun ní ki dū ti-baabi ki kāaǹ. A nìn dáaĺ anibul tafal ní ki yāntì an bútì ti-baabi.

⁴An kaa sá bi-janjawanti ní bi nìn dūu jáń ki fōō kitiŋ, kaa tí sá bi-pɔŋŋu pu ní bi nìn ká dijajil. Ama an nìn sá a-pɔŋŋu nì a-kpabil pu, nì a-bítam bi-cee, di sá yii bi-bɔti nìn mɔ̄ǹ-si.

⁵Sii di sá m-Bɔtiu nì m-Nimbɔtiu, tīī mara ní a-nibul ń ká dijajil.

⁶Sii pu ní ti jáà ki pɔ́ɔkíǹ ti-nannanliibi, a-yindi pu ní ti tà ki mátí bin dòoń ki jáà nì tee.

⁷Maa máká m-tɔbu pu, an kaa tí sá m-tàataajiki di tìì-mi dijajil.

⁸Sii di fìil̄-ti ti-nannanliibi ŋaan, ní ki kɔ̄ntí bin ná-tee icoo.

⁹Ti làá nīn gà ilan ki nyɔ́ŋkí sii Unimbɔti baabadal, ní kí nīn jáaḿ-si kí taa gbèen̄.

¹⁰Kɔŋkɔnnee, a dū-ti ki fá ki kɔ́ǹ-ti icoo. Aa ti lìntī ti-janjakitiŋ nyɔkɔpu.

¹¹A yāntì taa ŋúń ki síl̀ ti-nannanliibi nimbiin, ní bi dɔ́miń ki fúkúl̀-ti pílpil.

¹²A dū-ti ki tīī kii ipii in bi cáǹ kí kpɔ̀ee, a yāntì ti yàl̄ ki tin kóòń nnicantimun.

¹³A dū a-nib ki nyáfì tilèel, kaa kpáàa nyàab̄ kí ká ipaati poon.

¹⁴A yāntì ti-kɔŋkɔnaatɔb sìí-ti, ní bin māntìi tú-tee bèel̄-ti ki lāā.

¹⁵A yāntì atimbun ŋin kíǹee cáá ti-bɔti ki gà ilan, ní bi bèel̄-ti ki gbákafí bi-yiliŋ.

¹⁶Baabadalee, m-naabuŋu di dɔ̄ m-nimbiin m wāĺ, ní maa ti ŋūǹ kí yáatí m-yil icoo pu.

¹⁷M gbìl̀ bi bèel̄-ti ki sìí-ti. M wāĺ unannanli nín bí ki tɔ̀ ipɔntoon puee.

¹⁸Tin bí nee kɔkɔ bāań-ti, ama taa súntì a-pu, kaa tí fātì ti-boon ki tīī a-poondi.

¹⁹Taa fātì ti-kpaŋkpamboon ki tīī-saaa, kaa yīntiǹ a-marab mun.

²⁰Ama a jìn̄-ti ki tɔ́ laakin jiiŋkpaaibi kóòyee, ki dū dibɔmbɔŋkpaandi ki bīiǹ ti-pu.

²¹Ti yaa nìn súntì ti-Nimbɔtiu pu ní ki mēē awaa abee,

²²sii Unimbɔti kaa bàà béetí-tàaa, sii un di nyí ti-pɔbiliŋ bɔɔŋŋee?

²³Sii ti-Dindaan pu ní ti tūŋkí ŋkúm baabadal, ní bi ŋáań-ti kii ipii in bi cáǹ kí kpɔ̀ee[54].

²⁴Ti-Dindaan, fìntī! Ba pu ní a dɔ̄ ki gèeǹ ní? Yīkìm̄, taa dū-ti kí fá kí nīn cá jaanjaan!

²⁵Ba pu ní a dū a-nimbiin ki bál̀-ti ki súntì ti-falaau nì bi nín wɔ́b́-ti puee míǹ?

²⁶Di sá yii ti dɔ̄ ntamin ki fìlim̀, ki cìb̄ kitiŋ.

²⁷Yīkìm̄, dāá jòoń-ti! A-neeŋkpaandi puee, dāá fīī-ti kí líí.