Read Ntcham Psaumes 45 Bible Online

Psaumes 45 - Ntcham bible

Psaumes 45

¹Koora dicaŋkun yab di ŋmàn̄ nlan nee ki tīī bilaŋgaaliibi kpiliu. Bi bɔ̀ɔ́ kubeeu ní ki gà-ŋu. Dineendi laŋŋu.

²Anyɔɔbunnyaan di gbí m-pɔbilin. M làá gāā nlammɔnti kí tīī ubɔti tinyool. M-nyɔkɔ ń nīn yáb̀ kí gāā nlan kii ugbaŋŋmal un yáb̀ee ŋmamɔɔŋŋuee.

³Sii di ŋān̄ ki jítiǹ binib kɔkɔ, a nyí isoon. An pu ní Unimbɔti bīiǹ a-boon kí nīn cá jaanjaan.

⁴Ubaatandaan, yòon̄ a-gbajau kí gbìn̄. An di sá a-nyooti nì a-kpaanti daaŋku.

⁵Jàkà nì kunyaaŋŋu kí mɔ̄tì ibaamɔn nì dibasintil nì deedee pu. A-ŋaŋgiil ń dàkà a-tuuŋŋi ŋin sá maamaaci tuuŋŋee.

⁶A-piiŋyi cɔ́m̀ tiŋan, - i sàatī ki kóò sii ubɔti nannanliibi pɔbiliŋ poon. Atimbun nib làá lítí a-taaŋi taapu.

⁷Unimbɔti, a-beel bí ní ki cá jaanjaan. A jīǹ a-beel nì deedee ní.

⁸A néeń tin bí deedeeyee ní ki ná tin kaa ŋān̄ee, an pu ní Unimbɔti, a-Nimbɔtiu[55] lēē-si, ki sītì a-pu dipɔɔpindi kpam a jítiǹ a-jutiibi kɔkɔ.

⁹A-wampeeŋkaati kɔkɔ sɔ́fì miiri nì disaaweendi nì kasiya talaalub ní, ní a-bɔtinaakooku kun bi dū kunti nyiŋŋi ki nákáǹ nákáǹee poonee, bi bɔ̀ɔ́ tibati ki gà ilan in tìì-si dipɔɔpindee.

¹⁰Ubɔti sapɔmbi bí ki ŋúb́ a-wanleeŋkaati, ní ubɔti nimpuu yú a-ŋaŋgiil pú ki lá sindaariyamɔnti wanléeŋkaati.

¹¹Pīlifì m-bisal, kpèè kí kpòon̄ a-tafal kí pīlifì. Súntí a-nibooliŋu nì a-baa dicaŋku yab pu.

¹²Yàntī a-nyaaŋku ń fáatíǹ ubɔti! Úǹ di kíǹ ki sá a-dindaan, gbàan̄ u-nimbiin.

¹³Tiir yab bin sá bigaajakpaambee làá dāá pɔ̄-si tiwan á nīn kíǹ ki là-bi.

¹⁴Ubɔti bɔɔn di kóòń nì tinyookpaandee, sindaariya ní bi dūu nyūntì u-bɔkutil.

¹⁵Dibɔkutil din u pēēyee cáá inyiŋfi kutuku pu, ní bi cáǹ-u ubɔti cee. Bisapɔmbi bin pá u-boon ki tútúǹ-uee mun kɔ́nní a-cee.

¹⁶Nì mmɔn nì ifaal ní bi kɔ̄ntí-bi ubɔti naakooku poon.

¹⁷Ubɔti, a-jipɔmbi làá dāá fōō a-naanjab yil kí kàl̄ dibeel, a làá dāá yàntī bí kpántí kitiŋ kɔkɔ pu abɔtibil.

¹⁸M làá yàntī bí nīn téetí a-yindi pu abin abin. Niinee báà ŋma làá nīn nyɔ́ŋkí-si kí taa gbèen̄.