Read Ntcham Psaumes 46 Bible Online

Psaumes 46 - Ntcham bible

Psaumes 46

¹Koora dicaŋkun yab laŋgaakpiliu laŋŋu, bi gà-ŋu nì kineejaka ní.

²Unimbɔti di sá timbi balilaŋki nì ti-pɔŋŋu, dinimbinaamandi yuntiŋuee, u pée bí ní kí jòoń-ti.

³An pu ní taa fàŋkí tiba, báà kitiŋ yaa bíi cìŋkāaa, ajoon yaa bíi kpìkitī ki lítí tiŋkunaaa,

⁴tiŋku nyiŋgbanti yaa yāŋkí tɔb ki ŋáań kuwoou ajoon cìŋkī.

⁵Mbun ŋubɔ bí ki cāabìń dipɔɔpindi Unimbɔti tiŋkin, laakin sá Yilpu Fɔ́ŋŋŋ Nimbɔtiu circir kɔŋkooŋŋu páaayee.

⁶Unimbɔti bí kitiŋ gbantin, tiba kpá kí ŋá-kì, kutaa tin pée lì yii ku wúntée, Unimbɔti bí kí jòoń-kì.

⁷Atimbun kɔ́ fìkil fikil poon, abee cīŋkì, Unimbɔti téeń ní kitiŋ dūntì.

⁸Unimbɔti Mpɔŋkɔdaan bí ti-cee, Jaakɔb Nimbɔtiu di sá timbi balilaŋki.

⁹Dāá kpèèmaan tin ti-Dindaan ŋée, maamaaci tuuŋŋi ŋin ní u ŋá kitiŋ puee.

¹⁰U yàntī tijáti gbèentí duulinya kɔkɔn, u kɔ́fí itɔfi, ki nyìitī ki gífí ŋkpamu, ní ki tùutī agbampɔɔ ŋŋmi.

¹¹Ti-Dindaan téeń yii: «Gbèem̄maan kujaauee! Béémaan yii man di sá Unimbɔti! Man di jīǹ atimbun pu dibeel, man di jīǹ kitiŋ kɔkɔ pu dibeel.»

¹²Unimbɔti Mpɔŋkɔdaan bí ti-cee, Jaakɔb Nimbɔtiu di sá timbi balilaŋki.