Read Ntcham Psaumes 48 Bible Online

Psaumes 48 - Ntcham bible

Psaumes 48

¹Nlan. Koora dicaŋkun yab laŋŋu.

²Ti-Dindaan sá ukpaan ní ki máaǹ bí nyɔ̄ŋkì-u úǹ ti-Nimbɔtiu tiŋkin, u-circir jool pu.

³Dì ŋān̄ ki fɔ̀kɔ̀ ní ki tìì kitiŋ kɔkɔ mmɔn. Ŋgan pú kúnti kuntee, Siiyɔn jool dee, ubɔtikpaan tiŋki[57].

⁴Siiyɔn guŋŋi poonee, bi nyí Unimbɔti nín sá bi-balilaŋkee.

⁵Kpèè, bibɔtiibi nìn kóoǹ ki kpáfì, bi còom̄ dicilpu ki cá kí já nì Siiyɔn tiŋki.

⁶Ama ŋyunti ŋun bi ká ti-Dindaanee, ní an ŋá-bi bitii. Bi fāŋkì ní ki sáǹ ki kátì.

⁷Dibɔbil pu niin ní bi-wunti kpíì, a lì kii unimpu un kā imatiŋween puee.

⁸A lì kii ŋwìiń nyalaŋki pú buŋku nín wìil̄ Taarsiisi meelab puee.

⁹Tin ti gbìl̄ bi sòon̄ee lafun sá tin ti ká ti-Dindaan Mpɔŋkɔdaan tiŋkinee, an dàkà yii ti-Nimbɔtiu tiŋkin. Unimbɔti di ŋúb́-kì kí nīn cá jaanjaan.

¹⁰Unimbɔti, ti téetí a-neeŋkpaandi pu a-diiku poon.

¹¹Unimbɔti, kii a-yindi nín gbītì ki tin sāā kitiŋ gbeennyɔkɔ puee, míǹ ní a-nyɔŋkii mun gbītì. Deedee gbí a-ŋaŋgiilin.

¹²Siiyɔn jool bíi fàal̀, Juuda timmu bí mmɔnni a-bɔsooŋyi pu.

¹³Còom̀maan kí màntīí tū Siiyɔn jool, kàam̀maan u-gunlɔkɔŋi.

¹⁴Kpèèmaan digundi din bi máń ki tú-dèe, kàam̀maan di-bɔtinaakɔti kí dāá dūú māafì bin baa láá màl̄ee

¹⁵yii Unimbɔti gbanti di sá ti-Nimbɔtiu kí nīn cá jaanjaan. Úǹ di làá nīn kpòotī-ti ŋyunti kamaa.