Read Ntcham Psaumes 49 Bible Online

Psaumes 49 - Ntcham bible

Psaumes 49

¹Koora dicaŋkun yab di gāā nlan nee ki tīī bilaŋgaaliibi kpiliu.

²Anibul kɔkɔ ń pīlifì tin bí nee, duulinya kɔkɔ nib ń kpòon̄ bi-tafaliŋ kí pīlifì,

³binifantantiibi nì binikpaambi, bigaajab nì bisoodambi kɔkɔ:

⁴m làá sòoǹ iciin nyɔɔbuŋŋi, tin kā m-pɔbilin m dàkafēe cáá taapu.

⁵M kpōoǹ m-tafal ki pílifì dilaŋkpandi, m làá bɔ̀ɔ̀ m-beeku kí lēē m-pɔɔŋŋu taapu kí dàkà.

⁶Ba pu ní ḿ nīn fàŋkí iwiŋkpiti dal, ŋyunti ŋun m-nannanliibi māntìi tú-mee?

⁷Bi máká bi-gaajati pu, ní ki yòontí bi-ba yilpu bi-gaajati nín wīikí puee pu.

⁸Ama báà unil mun kaa ŋūǹ kí dā Unimbɔti cee u-juti maŋfal, àá kí pà úǹ u-ba maŋfal pu.

⁹Báà unil yaa tīī pu kí dā u-maŋfalee, dì làá dāá pée kúntí ní kí nīn cá jaanjaan.

¹⁰Unil ŋūǹ kí nīn bí jaanjaan kí taa kpú dalba dalbaaa?

¹¹Ti ká ki gíti káa! Biciŋfitiibi kúù, ní bigbaambi nì biwaatiibi mun kúù, ní kí búntí kí yàntī bi-gaajati ní biba ń dāá yòon̄.

¹²Min kamaa bi dū bi-yiŋŋi ki pú bi-tampaaŋyee, dikaakul di làá nīn sá bi-dumpui kí nīn cá jaanjaan, ní bí nīn kóò niin kí nīn cá abin abin.

¹³Unil nyooti kaa làá ŋmā kí yàntī ú taa kpú, u làá pée kpú kii kuwaŋkuluuee ní.

¹⁴Kpèè bin máká bi-ba puee kúntitam dee, nì bin pá bi-boon ki néeń bi nín sòoǹ puee.

¹⁵Bi téekí-bi ki cáǹ ditaŋkpiilin kii ipiiyee, ŋkúm di làá nīn kpàá-bi. - Kutaafaauee, deedeedambi làá nīn tà-bi, - ní bi-nyaaŋku ń wāŋkì ditaŋkpiilin, ní bí nīn kíǹ ki dátiǹ bi-dumpui.

¹⁶Ama Unimbɔti làá dā m-naŋki kí nyāntí ditaŋkpiilin, tiŋman, u làá fīī-mi.

¹⁷Ubɔ yaa kpántì ugaajee, án taa kɔ́-si nnimbitaataam, báà u-gaajati gbanti yaa mɔ̀tīi wīintí ki cá.

¹⁸Di sá yii u yaa kpíì, waa làá kpáaǹ báà tiba[58] ní u-nyooti kaa làá táá-u kí kɔ́ dikaakulin.

¹⁹Ŋyunti ŋun u nìn dáá bí dimaŋfalinee, u nìn pàkà u-ba ki lì yii: «Bi nyɔ́ŋkí-si, di sá yii an bútì-si tikɔkɔ poon!»

²⁰U làá cùú ŋàl̄ u-naanjab ditaŋkpiilin, bíǹ bin gíti kpá kí ká ŋwalifi dalba dalbee.

²¹Unil nì u-nyooti kɔkɔee, u yaa kaa gbìl̀ taapuee, u làá kpú kii kuwaŋkuluuee ní.