Read Ntcham Psaumes 52 Bible Online

Psaumes 52 - Ntcham bible

Psaumes 52

¹Daafiidi di ŋmàn̄ nlan nee ki tīī bilaŋgaaliibi kpiliu.

²Ueedoomja Dooweegi nìn cūtìi tùkū Sayuul yii: «Daafiidi cūtì Ayiimeeleeki cee.»

³Ubaatandaan, ba pu ní a yòontí a-ba a-kpitii pu míǹ? Unimbɔti ŋanti bí ní baabadal.

⁴A-limbil sòoǹ ki bɔ́ntí min a làá ŋá ikpitee, dì jītí kii bɔlfi un bi lōoǹee, ní ki yáb̀ ki sòoǹ tinyimɔmbɔti.

⁵A néeń tikpitil ki jítiǹ tiŋan, ní ki néeń nnyimɔn ki jítiǹ mbaamɔn.

⁶A néeń kí sòoǹ kí bīil̀ unil, a-limbil ŋmàtíǹ binib ŋma ní.

⁷Unimbɔti u-ba di làá nàan̄-si múb, u làá dáaĺ-si kí nyāntí a-diikun, ní kí lēē-si binifoobi tiŋki pu.

⁸Deedeedambi làá dāá ká ní kí fàŋkì, ní kí dāá nīn lāā ki lì yii:

⁹«Kpèè ubaatandaan un kaa nìn sáǹ ki kɔ́ Unimbɔti, ama ní ki nìn máká u-gaajati pu, ki dàkafī yii u pɔ̄ɔ̄yee sèé!»

¹⁰Ama mamee, m bí kii ɔliifi subu bun túkúee ní Unimbɔti diikun. Unimbɔti neeŋkpaandi pu ní m máká kí nīn cá jaanjaan.

¹¹M làá nīn pée nyɔ́ŋkí-si ní kí taa gbèen̄ kun ní a ŋée pu. M làá nīn máká a-yindi pu bin yú nì si deedeeyee nimbiin, di sá yii an ŋān̄ míǹ. M làá nyɔ̄ŋkì-si deedeedambi nimbiin.