Read Ntcham Psaumes 55 Bible Online

Psaumes 55 - Ntcham bible

Psaumes 55

¹Daafiidi di ŋmàn̄ nlan nee ki tīī bilaŋgaaliibi kpiliu. Bi bɔ̀ɔ́ tibati ní ki gà-ŋu.

²Unimbɔti, pīlifì m-wimmeem, m yaa bíi gbàam̄-see, á taa fàtī a-boon kí tīī-mi.

³Pīlifì-mi kí kíí-mi. Maa ti nyí tin poon m bée ní m bí ki yáliŋkí

⁴m-nannanliibi nín sòoǹ puee, nì bitɔŋfitiibi nín wɔ́b̀-mi puee. Di sá yii bi cáá agìń ki tòó m-pu, ní ki jáà nì mi nì diŋuul.

⁵M-pɔbil máfí ní ŋkúm nyoondi cúú-mi.

⁶Kufaaŋŋu cúú-mi m bíi jìkì, ní m-wunti dūu kpíì.

⁷Niinee ní m lī m-ban yii: «M kāntí la dibeenanjil feeŋyi! M bàà làá ŋàaǹ kí cùú nīn bíń laaba.

⁸Tiŋman, m bàà làá cù ndandati, kí tin nín̄ kóò kuteeun.

⁹M bàà làá ŋá malaa kí ká kibalilaŋ, kí nīn dátiǹ kubuŋkpaaŋŋu nee.»

¹⁰Ti-Dindaan, kɔ́ǹ-bi fìkil fikil poon, kí yàntī bi-limbiliŋ ń nyìŋfì. Di sá yii m ká tipɔmbɔti nì kunikpɔŋkpɔkɔu kitiŋ nee poon.

¹¹Bi tɔ́kɔ́ digundi yilpu ki còom̄ ki màntī ŋwiimpu nì kunyeeu. Kitiŋ ki-ba poonee, an sá digaŋgam nì dinimbinaamandi ní,

¹²nnikpaakoon bí ki-poon. Ki-sampaambi kaa lóotí tipɔmbɔti nì dikiildi.

¹³An yaa bàà sá m-nannanliu di bíi sìí-mi, m bàà ŋūǹ kí ŋmèè. An yaa sá m-pulincɔnti di kpèé ki sìŋkīǹ-mi, m bàà búntí kí wàatī-u.

¹⁴Ama an sá sii, m-nabiki, m-bɔɔmɔnti, unil un man nì u tāatée!

¹⁵Ti nìn sòoǹ ní an mɔ̄ ní ki nìn còom̄ dicilpu míǹ kunimbɔtidiin.

¹⁶Yàntī m-nannanliibi ń kpú ŋkúntuntukum! Bí nīn wāĺ nì bi-nimbiliŋ ní kí sìntī ditaŋkpiilin, di sá yii ntoom bí bi-dumpui ki bí bi-pɔbiliŋin.

¹⁷Mamee, Unimbɔti ní m yíì, ní úǹ ti-Dindaan di làá fīī-mi.

¹⁸Kutaafaau nì ŋwiimpu nì kujoou, m yáliŋkí ki fátí diniindi. Ama u gbìl̄ m-neen pu,

¹⁹ki fīī-mi ki wúń m-pu ŋyunti ŋun bi nìn bíi jáà nì mee, di sá yii m-nannanliibi nìn wīikí m-pu.

²⁰Unimbɔti ń pīlifiǹ-mi kí sìntīǹ-bi taapu, úǹ un sá ubɔti kí nīn cá jaanjaanee! Baa làá kpántí bi-ba, baa fàŋkí Unimbɔti.

²¹M-bɔɔmɔnti gbanti jáà nì u-bɔɔbi ní, waa tɔ́ dipoondi din u pōoǹee.

²²U-nyɔkɔ mɔ̄ kii tisiilee ní, ama ní u-poon tū kátí kati. U-nyɔɔbuŋŋi mèeǹ kii dikpajundee ní, ama ki jītí kii kitàataajikee.

²³Túutí a-waŋgul kí dūú túń ti-Dindaan[66], u làá tíkiń-si, u kpá kí yàntī tiba ń cìŋkì deedeedaan.

²⁴Ama sii Unimbɔti, a làá yàntī binib gbanti ń sìntī ditaŋkpiilin. Nnikpaakoon dambi nì binyimɔndambi nee kaa làá bà bi-wiiŋyi dijandi gba. Ama mamee, sii pu ní m máká.