Read Ntcham Psaumes 56 Bible Online

Psaumes 56 - Ntcham bible

Psaumes 56

¹Fiiliistii yab nín cúú Daafiidi Gaati tiŋkinee, boon ní u ŋmàn̄ nlan nee ki tīī bilaŋgaaliibi kpiliu. Bi gà-ŋu kii dibeenanjil nín sūǹní ndan puee ní[67].

²Unimbɔti, sɔ̄ m-saai, di sá yii bi kā m-pu, ŋwiin kamaa, bi jáà nì mi ki wɔ́b̀-mi.

³M-nannanliibi kā m-pu baabadal. Bin bí ki jáà nì mee wīikí tikpil.

⁴Ama ŋyunti ŋun kufaaŋŋu yaa cúú-mee, m dù m-mákal kí páań sii pu ní.

⁵M nyɔ́ŋkí Unimbɔti u-nyɔɔbundi pu, m máká u-pu ní kaa fàŋkí tiba. Ba ní nisaaleen ŋūǹ kí ŋá-mi?

⁶Ŋwiin kamaayee, bi cútí m-nyɔɔbuŋŋi ki kpántí, bi pée dàkafī m-pu tikpitil ŋma ní.

⁷Bi bāal̀ ki cɔ́ŋkí-mi ní ki kpèé tin kɔkɔ m ŋáańee ki pée nyàab̀ kí lēē m-maŋfal.

⁸Atuŋkpiti nee puee, bi làá ŋmátáaa? Unimbɔti, a-ŋuul ń fáá binib nee kí lúkú!

⁹A kàan̄ ŋfunyɔm min m sáǹee. Tíkiń m-nyinnyim kí ŋá a-lookun. Aa kàan̄-mì ki ŋá a-gbɔŋkunaaa?

¹⁰Ŋwiin ŋun m làá dāá yíiń-see, m-nannanliibi làá dāá fàtīí gítí bi-boon. Tin m nyée di sá yii Unimbɔti bí m-jandi pú.

¹¹M nyɔ́ŋkí Unimbɔti tin u sòon̄ee pu, m nyɔ́ŋkí ti-Dindaan u-nyɔɔbundi pu.

¹²M máká Unimbɔti pu ní kaa fàŋkí tiba. Ba ní unil ŋūǹ kí ŋá-mi?

¹³Unimbɔti, m nín pōoǹ-si puee, m làá ŋá míǹ. M làá ŋá ijaam saraau kí tīī-si.

¹⁴Di sá yii a fīī-mi ki nyántì ŋkúmin, kaa yāntì m lítì. Míǹ puee, m làá nīn còom̄ Unimbɔti nimbiin ŋwalifi ŋun ŋmíntí binifoobee poon.