Read Ntcham Psaumes 57 Bible Online

Psaumes 57 - Ntcham bible

Psaumes 57

¹Daafiidi nín sáǹ ki kɔ́ ntaŋkpalɔkɔn ki ŋmátì Sayuul ŋaanee ní u gāā nlan nee ki tīī bilaŋgaaliibi kpiliu[68].

²Sɔ̄ m-saai, Unimbɔti sɔ̄ m-saai, di sá yii sii ní m sáǹ ki kɔ́. A-feeŋyi booŋŋu taapu ní m sáǹ ki kɔ́ kí nīn cí dinimbinaamandi nee ń jītí.

³Yilpu fɔ́ŋŋŋ Nimbɔtiu ní m yíì, Unimbɔti un làá ŋá tikɔkɔ kí tīī-mee.

⁴U làá tīiń-mi difiil doooo yilpu, u làá yàntī icoo ń cúú un kā m-puee. Unimbɔti làá dàkà-mi u-neeŋkpaandi nì u-deedeeu.

⁵M dɔ̄ binib bin bí kii gbikintib bin ŋmóò binibee kansikin ní. Bi-nyiŋŋi cɔ́m̀ kii ŋkpamu nì ipiinee ní, ní bi-limbiliŋ jītí kii bɔlfee.

⁶Unimbɔti, a sá ukpaan ki jítiǹ kutagbɔŋu, yàntī a-nyooti ń gbí kitiŋ kɔkɔ!

⁷Bi dū kulaaŋŋu ki píĺ m-saŋŋu pu, maa ti cáá dimákal. Bi gbìn̄ mbòó ki píĺ-mi, ama bíǹ bi-ba di jéetì ŋu-poon.

⁸M cáá dimákal, Unimbɔti, m lafun baasii cáá dimákal ní, m làá gāā nlan kí nyɔ̄ŋkì-si.

⁹M-naŋki, fìntī, iŋmii saalaa beeku saŋguu, fìntīmaanee, m làá péeǹ kutaa kí fìntī.

¹⁰Ti-Dindaan, m làá nyɔ̄ŋkì-si anibul kansikin, m làá gāā ilan kí pàkà-si atimbun kansikin.

¹¹Di sá yii a-neeŋkpaandi tùutī kutagbɔŋu, ní a-deedeeu sàatī atagban.

¹²Unimbɔti, a sá ukpaan ki jítiǹ kutagbɔŋu, yàntī a-nyooti ń gbí kitiŋ kɔkɔ!