Read Ntcham Psaumes 58 Bible Online

Psaumes 58 - Ntcham bible

Psaumes 58

¹Daafiidi di ŋmàn̄ nlan nee ki tīī bilaŋgaaliibi kpiliu. Bi gà-ŋu nì nneen ŋun sá «Taa yàntī bí bīil̀ee...» ní.

²Tiŋman, ni yaa sòoǹee, ibaamɔn ŋmí ní. Nnibiyaamu, ni sòoǹ binib bɔti deedeeee?

³Aayee! Ni pée nyí ní ki ŋáań ikpiti, nimbi ni-ba di ŋáań tipɔmbɔti kitiŋ pu.

⁴Binikpitib pée sá bikpitib doooo bi-na poon ní, bi tin pée lì yii bi màal̀-bee, bi kíĺ bi bíi mɔ́ntí.

⁵Bi cáá tilool kii ukoobuee ní. Bi bí kii ukoowaati un kpáá u-tafaliŋ,

⁶kaa pílifí ikoobu laŋgaaliu laŋŋu[69], àá ukpaŋkpanti un bīń tiŋanee.

⁷Unimbɔti, gbá kí wūkul̀ bi-nyiŋŋi bi-nyɔmmun, ti-Dindaan, gbá kí fúkutí agbikintipɔmbil gbanti nyiŋŋi.

⁸Yàntī bí wāŋkì kii nnyim min dɔ̄ ki pùub̀ee! Yàntī bi-piiŋyi in bi tòóyee ń kpántí ipincal.

⁹Bí nīn bí kii yaaweel un còom̄ ki kōō ki cée! Bí taa wāl̀ ŋwìiń kii kibiki kin bi màl̄ kaa yōoǹee!

¹⁰Kí wàatī bi-bɔjanaakuŋŋi ń wíiǹ kí ŋá akpaanee, kunaakpaabuŋŋu kubɔ ń dāá yòon̄-ŋi, báà ŋi yaa dá láá sɔ̀m̀aaa, ŋi yaa kūńaaa, an kaa páb́.

¹¹Deedeedaan yaa láa ká Unimbɔti bíi dátí binikpitib tafalee, án làá dāá mɔ̄ɔkiǹ-u ní ú dāá fíntí u-taaŋi bi-fatikuu poon.

¹²Binib làá dāá lì yii: «Deedeedaan lafun cáá tipaal. Tiŋman, Unimbɔti ubɔ lafun bí kitiŋ nee pu ki sòoǹ binib bɔti.»