Read Ntcham Psaumes 59 Bible Online

Psaumes 59 - Ntcham bible

Psaumes 59

¹Daafiidi di ŋmàn̄ nlan nee ki tīī bilaŋgaaliibi kpiliu. Bi gà-ŋu nì nneen ŋun sá «Taa yàntī bí bīil̀ee...» ní. Saayuul nìn tú binib bí cù Daafiidi dumpu kí kpèè yii u yaa bée, bí kpɔ̀-u[70].

²Unimbɔti, fīī-mi kí nyāntí m-nannanliibi ŋaan, wúń m-pu bin jáà nì mee ń taa ŋmā kí ŋá-mi tiba.

³Fīī-mi kí nyāntí binikpitib nee ŋaan, fīī-mi binikpɔliibi nee ŋaan.

⁴Kpèè! Bi cí kí lēē m-maŋfal, bin pɔ̄ɔ̄yee bíi jáà nì mi. Ma mun kaa ŋá ikpiti ibaaa, kaa tí yīntì mun, ti-Dindaan!

⁵Maa ŋá tikpitil tiba, ama bi sáń kí cùú bɔ́ntí kí cīití-mi. Fìntī! Dāan̄ m-cee kí kpèè.

⁶Sii ti-Dindaan, Unimbɔti Mpɔŋkɔdaan, Isirayeel Nimbɔtiuee, fìntī kí dáaĺ atimbun nee kɔkɔ tafal. Taa sɔ̄ bin nyēē bi-bɔɔbi booŋyi nee saai.

⁷Bi fàtīi gítiń kujoou kamaa ki mùuǹ kii ibooyee, ní ki còom̄ ki màntī kitiŋ.

⁸Ntoonam di gbí bi-nyɔmmun, ní bi-nyɔɔbuŋŋi bí kii kitàataajikee. Bi dàkafī bi-ni yii: «Ŋma di làá gbìl̄?»

⁹Ama sii ti-Dindaan, a bí ní ki lāā-bi, a bèel̄ atimbun nee kɔkɔ nib.

¹⁰Sii ní m kpèé, man pɔŋŋu. Unimbɔti di sá man taŋkpanaakooku.

¹¹Man Nimbɔtiu néeń-mi ní ki làá dāá fīī-mi. Man Nimbɔtiu làá yàntī ń jī m-nannanliibi pu dinyandi.

¹²Taa nàan̄-bi kɔŋkɔnnee, an yaa kaa sá míǹ, m-nibul làá súntí a-jajil pu. Dū a-pɔŋŋu kí gbāfì-bi kí fá ní kí sìntī-bi taapu, ti-Dindaan, ti-gbampɔɔl.

¹³Bi yaa pée kíĺ isoonee, ikpiti ŋma di nyēē bi-nyɔmmun, yàntī bi-lambil ń kpántí kii kutaliŋŋuee kí sàl̀-bi, kun puee bi tòó mbusu ki mɔ́ntí inyimɔn!

¹⁴Nàan̄-bi a-ŋuul poon, kpɔ̀ kí céetí-bi múb ubɔ ń taa ti kíń. Yàntī bí béé yii Unimbɔti di sá Jaakɔb bɔtiu kí cáá sāā kitiŋ kúntilaŋki.

¹⁵Bi fàtīi gítiń kujoou kamaa ki mùuǹ kii ibooyee, ní ki còom̄ ki màntī kitiŋ.

¹⁶Bi còom̄ ki nyàab̀ kun ní bi làá jēe, ní bi yaa kaa jíń ki díkée, ní bí kíĺ ki bíi gbóoĺ.

¹⁷Ama mamee, m làá nīn gà ilan ki pàkà a-pɔŋŋu, m làá nīn gà ilan kutaafaau ki lì yii: «A ŋān̄,» di sá yii sii di sá m-taŋkpanaakooku, dinimbinaamandi yuntiŋuee, sii Unimbɔti ní m sáń ki kóò.

¹⁸Sii un sá m-pɔŋŋuee, m làá nīn nyɔ́ŋkí-si. Man taŋkpanaakooku di sá Unimbɔti, Unimbɔti gbanti di néeń-mi.