Read Ntcham Psaumes 60 Bible Online

Psaumes 60 - Ntcham bible

Psaumes 60

¹Daafiidi di ŋmàn̄ nlan nee ki tīī bilaŋgaaliibi kpiliu bí nīn cáa dàkà. Bi bɔ̀ɔ́ kubeeu ní ki gà-ŋu.

²Daafiidi cūtìi jáń nì Aram yab bin kóò Meesoopootamii nì Sooba timmunee. Bi nín kūnnée, Joowaab fātìi gítì ki kūū Eedoom yab binib kutukub saalaa nì bili Ŋyaam tantakalin[71]. Niinee ní Daafiidi lī yii:

³Unimbɔti, a dū-ti ki fá, ki yāntì ti yàl̄. Min kamaa a gíí ti-pu diŋuulee, fàtīí tīī-ti mpɔn.

⁴A yāntì kitiŋ cīŋkì ki fáá iwèeń, fàtīí ŋéeb́ ki-wèeŋ́yi, di sá yii kàa ti yú ki pɔ̄ɔ̄.

⁵A yāntì a-nibul jíń falaa tikpil, a yāntì ti nyùn̄ ndaam min pɔ̄ɔ̄yee[72].

⁶A tīī bin fàŋkí-see kudaaŋŋu bí sāǹ ipiin ń taa cúú-bi.

⁷Dū a-pɔŋkpaaŋŋu kí fīī-ti kí fōō ti-wimmeem, án nín làá ŋá pu a-nib bin a néeńee ń ká difiilee.

⁸Unimbɔti sòon̄ u-circir diiku poon. M jáń ki jíń! M làá yàkatī Siikeem tiŋki, ní kí ŋmàntī Sukooti tantakal.

⁹Man di yì Galaadi, man di tí yì Manasee mun. Eefiraayiim di sá man janjafuuliiki, ní Juuda sá m-beel pɔŋŋu.

¹⁰Moowaab sá kusampeeu kun poon m fùul̀ee ní. M tákatì m-naatakal ki lúkú Eedoom tiŋki pu[73], m fátí dijajil kuŋkuuntii Fiiliistii tiŋki pu.

¹¹Ŋma di làá cùnnì-mi kitiŋ kin bi máń digundi ki túee poon ní? Ŋma di làá cùnnì-mi Eedoom tiŋkin,

¹²an kaa sá sii Unimbɔti un di dū-ti ki fá, kaa ti cēentí ti-janjakitiŋeeee?

¹³Dāá tūtuǹ-ti tí já nì unannanli, di sá yii unil tūtuntam sá fám ní.

¹⁴Unimbɔti yaa bí ti-ceeyee, ti làá já kí jī, úǹ di làá tāā kí mátí ti-nannanliibi.