Read Ntcham Psaumes 61 Bible Online

Psaumes 61 - Ntcham bible

Psaumes 61

¹Daafiidi di ŋmàn̄ nlan nee ki tīī bilaŋgaaliibi kpiliu. Bi bɔ̀ɔ́ kubeeu ní ki gà-ŋu.

²Unimbɔti, pīlifì m-biilii, kpòon̄ a-tafal kí pīlifì m-wimmeem.

³Doooo kitiŋ gbeennyɔkɔ, ŋyunti ŋun m-pɔbil bíil̀ee, m kúuǹ ki yíiń-si á jòoń-mi. Cáá-mi kí cùnnì ditaŋkpal din fɔ̀kɔ̀ maa ŋūǹ kí bà nee cee.

⁴Di sá yii sii ní m sáń ki kóò, a sá digunlɔkɔl din pɔ̄ɔ̄yee ní m-nannanliibi nimbiin.

⁵M bàà là kí nīn kóò a-circir kɔŋkooŋŋun baabadal, ní kí ká kibalilaŋ a-feeŋyi taapu.

⁶Unimbɔti, sii di gbìl̄ m-pooŋyi, ní ki tīī bin fàŋkí a-yindee kun bi lèe.

⁷Kūtì ubɔti mmaŋfafɔkɔn, yàntī ú kàl̄ kitiŋ pu doo kí yúntí tikpil tikpil!

⁸Ú nīn pée kā dibeel pu ki cá jaanjaan a-nimbiin. Yàntī a-neeŋkpaandi nì a-baamɔŋyi ń nīn wúń u-pu.

⁹Niinee m làá nīn gà ilan baabadal ki nyɔ́ŋkí-si, ní kí nīn ŋúb́ m-pooŋyi baabadal.