Read Ntcham Psaumes 62 Bible Online

Psaumes 62 - Ntcham bible

Psaumes 62

¹Daafiidi di ŋmàn̄ nlan nee ki tīī bilaŋgaaliibi kpiliu.

²Unimbɔti cee ní m kāntí dipɔɔsɔŋkil. U-cee ní m-fiil nyēeń.

³Úǹ di sá m-taŋkpanaakooku nì m-fiil. U sá m-balilaŋki, tiba kpá kí cìŋkì-mi.

⁴Kí cáá sāā ŋyunti ŋulɔŋu ní ni làá kpāfì kí lùkù unibaanti kí líí-u kii digundi din wāntèe, àá kunaabakau kun bíi lítée ní?

⁵Tinyool paaŋŋu ŋun pu u bée pu ní ni bí ki mɔ̀ kí kpákatí-u. Kun pée mɔ̄ǹ-nee di sá inyimɔn. Ni mèé kinyɔkɔn fám ní ki bìintí, ama ni-pɔbiliŋ poonee, ni tòó mbusu.

⁶Unimbɔti cee ní m kāntí dipɔɔsɔŋkil, u-cee ní m-mákal nyēeń.

⁷Úǹ di sá m-taŋkpanaakooku nì m-fiil. U sá m-balilaŋki, tiba kpá kí cìŋkì-mi.

⁸Unimbɔti di fìil̄-mi ki tìì-mi tinyool. Úǹ di sá m-taŋkpanaakooku nì laakin m sáń ki kóòyee.

⁹Nimbi m-nibul, nín̄ mákámaan u-pu ŋyunti kamaa! Dūmaan tin páb́-nee kí bíĺ u-nimbiin. Unimbɔti ní ti sáń ki kóò.

¹⁰Unil sá kii kubuŋuee ní, bikpaambeeee, ŋwaamueeee, ubɔ kaa bí tiban. Dū bi-kɔkɔ kí páań saniya pu kí ŋmàntī, bi-nyiŋfiŋu kaa làá bà kufoou nyiŋfiŋu gba.

¹¹Taa nín̄ mákámaan tipɔmbɔti pu, kí taa nín̄ máká tiwan tin ni fìkēe pu. Báà ni-gaajati yaa bíi wīintáaa, ní taa nín̄ máká ti-pu.

¹²Unimbɔti sòon̄ tibɔti tiba, u sòon̄ tibɔliliitiil tiba mun m gbìl̄, yii: «Unimbɔti di yì mpɔn.»

¹³Sii ti-Dindaan di cáá dineeŋkpaandi, ní ki pà báà ŋma u-tuuŋŋi paati[74].