Read Ntcham Psaumes 64 Bible Online

Psaumes 64 - Ntcham bible

Psaumes 64

¹Daafiidi di ŋmàn̄ nlan nee ki tīī bilaŋgaaliibi kpiliu.

²Unimbɔti, pīlifì m-yaliŋkii. Fīī-mi kí nyāntí unannanli un m fàŋkée ŋaan.

³Fīī-mi kí nyāntí binikpitib nín bíi bɔ́ntí m-pu puee, nì bikpitiŋaliibi nín bíi kpáfí m-pu miŋyee poon.

⁴Bi-limbiliŋ jītí kii bɔlfee, ní bi-nyɔɔbuŋŋi cáá tilool kii ilɔpiinee.

⁵Bi bāal̀ kí tɔ̄ deedeedaan mpiin. Bi tòó-u dicilpu niin, kaa fàŋkí tiba.

⁶Bi tìì tɔb kunyannyaau bi-tuŋkpitiŋ poon, ki sòoǹ titalindi tin bi làá píĺ dibalinee pu yii: «Ŋma di làá wāl̀?»

⁷Bi bɔ́ntí atuŋkpiti ŋin bi làá ŋée. Bi lì yii: «Ti bɔ́ntì ti-tundi nee tiŋan: ubɔ kaa ŋūǹ kí béé kun kā unil pɔbilinee!»

⁸Ama Unimbɔti làá tɔ̄-bi u-piiŋyi. Dicilpu niinee, bi fōō tiweendi.

⁹Bíǹ bi-ba nyɔɔbuŋŋi di fātìi gítì bi-pu. Bin kɔkɔ làá dāá ká-bee dāa gàatī bi-yiliŋ ní.

¹⁰Báà ŋma làá dāá fàŋkì. Binib làá dāá māafì tin Unimbɔti ŋée, ní kí dāá gbìl̄ tin u ŋée taapu.

¹¹Deedeedambi ń nīn fàal̀ ti-Dindaan pu, bí sāǹ kí kɔ́-u, ní bin kɔkɔ pɔbil bí diba nì Unimbɔtee ń nyɔ̄ŋkì-u.