Read Ntcham Psaumes 65 Bible Online

Psaumes 65 - Ntcham bible

Psaumes 65

¹Daafiidi di ŋmàn̄ nlan nee ki tīī bilaŋgaaliibi kpiliu. Nlan.

²Unimbɔti un bí Siiyɔn tiŋkinee, an máaǹ tí nyɔ̄ŋkì-si, ní kí ŋá min ti pōoǹ-see.

³Di sá yii a fòol̄ binib wimmeem. Unil kamaa dòoń a-cee.

⁴M-kpitii nyìmiǹ-mi, ama a cáá ti-kpitii kɔkɔ ki pūǹ-ti.

⁵Unil un a lēē ki yíiń ú dāan̄ a-ceeyee bí mmɔnneeee! Udaan làá nīn kóò a-kɔŋkooŋŋun. Ti làá dāá fōō tiwammɔntiil tin bí a-diikunee, circir wanti tin bí a-kɔŋkooŋŋunee.

⁶Unimbɔti ti-fiiliu, a sá deedeedaan, a cáá maamaaci tuuŋŋi ki fòol̄ ti-wimmeem. Kitiŋ kɔkɔ pu nib nì tiŋkub bin bíń ndandatee máká sii pu ní.

⁷Nì a-pɔŋŋu ní a dūu báaǹ ajoon ní ŋi bá ki pɔ̄ɔ̄, kun puee a dū mpɔn ki gbìn̄ a-caŋ kii gbajee.

⁸A pèefī tiŋkub wooku, ki pèefī bi-nyiŋgbanti fuuku, nì inibool kuŋkuuntii.

⁹A-maamaaci tuŋkpaaŋŋi ŋin a ŋée puee, duulinya nib kɔkɔ fāŋkì. A yàntī ŋwìiń nyalaŋki pú nì ŋwìiń jeetilaŋki pú timmu kūuntí nì dipɔɔpindi.

¹⁰A kpèé kitiŋ, ki sɔ̀ŋkī-kì ntaanyim, ki gbéeǹ-kì tigaajati. Unimbɔti, nnyim gbí a-buŋŋu[77], a yàntī kitiŋ lòoǹ tikpaajin tiŋan, min ní a bɔ́ntí-kèe dee.

¹¹A yàantí ki-pɔŋyi, ki kpátí ki-tannaapikiŋ, ki yàntī utaa nì ki sɔ̀ŋkī-kì, ní ki tìì iwambool mpɔn í nyā.

¹²A yàntī dibindi kúntí tiŋan laakin kamaa a yaa jítèe, digbíl pùub̀ ní.

¹³Kuteeu pu naakpaapɔɔku mun cáá tigaajati tibaantiil ní, ní mmɔn māntìi tú ŋgbantamu.

¹⁴Tiwaŋkuti kpátìi gbí kunaakpaapɔɔun, ní tikpaajin bīī atantaka pu, tikɔkɔ kūuntí nì mmɔn ki gà ilan.