Read Ntcham Psaumes 66 Bible Online

Psaumes 66 - Ntcham bible

Psaumes 66

¹Bilaŋgaaliibi kpiliu laŋŋu. Nlan. Kitiŋ pu kɔkɔ nib, fáámaan ŋwiliili kí nyɔ̄ŋkì Unimbɔti.

²Gāāmaan ilan kí nyɔ̄ŋkì u-yindi, dūmaan inyɔŋki laŋyi kí tīī-u tinyool.

³Ní lì Unimbɔti yii: «A-tuuŋŋi sá maamaaceeee!» A-pɔŋŋu nín sá ŋkpaan puee, a-nannanliibi pàkà-si.

⁴Kitiŋ pu nib kɔkɔ gbàantí a-nimbiin ki jáaḿ-si. Bi gà ilan ki nyɔ́ŋkí-si, bi gà ilan ki nyɔ́ŋkí a-yindi.

⁵Dāá kpèèmaan tin Unimbɔti ŋée, u-tuuŋŋi kɔ̄ntí binib dinyoondi.

⁶U yāntì tiŋku fóotì ki kpántì kitiŋkuliŋŋi, binib dūtì dimɔɔl ŋkulimmi[78]. An puee tí fàal̀ tin u ŋá nee pu.

⁷Nì dibaatandi ní u jīǹ dibeel ki cá talku. U kpèé ki wāĺ atimbun kɔkɔ. Bin jáà nì uee ń taa nín̄ yòontí bi-ba yilpu!

⁸Anibul kɔkɔ, jāam̀maan ti-Nimbɔtiu, nyɔ̄ŋkìmaan-u mpɔn mpɔn.

⁹Úǹ di yāntì ti bí dimaŋfalin ní kaa yāntì ti-taaŋi ŋātì.

¹⁰Unimbɔti, a cɔ́ŋkì-ti ki kpēē. A cɔ́ŋkì-ti ki kpēē kii bi nín ŋáań sindaariya ŋŋmin kí cɔ̄ŋkì-u kí kpèè puee ní, míǹ ní a cɔ́ŋkì-ti.

¹¹A cáá-ti ki kɔ́ǹ kulaaŋŋun, a dū awaŋgul ŋin nyìm̀ee ki túǹ-ti.

¹²A yāntì bitanjakaliibi dū itaamu ki tāā ti-yiliŋ pu ki jítì. Ti kɔ́ ŋŋmi nì nnyimin, ama a nyántì-ti ki kɔ́ǹ digbíl poon.

¹³M làá cáań bisaraawɔkaabi a-diikun, m làá ŋá tin m pōoǹ yii m làá ŋá kí tīī-see.

¹⁴M làá cáań tin nìn nyáń m-nyɔkɔn ŋyunti ŋun m nìn bí dinimbinaamandinee kí tīī-si.

¹⁵M làá dū tiwaŋkuti tin cáá ŋkpamee kí ŋá saraawɔkaa kí tīī-si. M làá dū ipijaa kí ŋá saraa kí wà ŋŋmi, m làá dū inajaa nì iŋɔjaa kí ŋá saraa.

¹⁶Nimbi bin kɔkɔ fàŋkí Unimbɔtee, dāá pīlifìmaan, m làá māafì-ni tin ní u ŋá ki tīī-mee.

¹⁷M fáá mbiil ki yíiń-u, ní ki kíĺ ki bíi nyɔ́ŋkí-u.

¹⁸M yaa bàà cáá ilandɔkɔkpiti m-nee, ti-Dindaan kaa bàà pílifíǹ-mi.

¹⁹Ama Unimbɔti pílifiǹ-mi, u kpōoǹ u-tafal ki pílifì m-wimmeem.

²⁰Tí jāam̀ Unimbɔti, kun puee waa fātì u-boon ki tīī m-wimmeem, ní kaa ŋmīntì-mi u-ŋaŋkpaanti.