Read Ntcham Psaumes 68 Bible Online

Psaumes 68 - Ntcham bible

Psaumes 68

¹Daafiidi di ŋmàn̄ nlan nee ki tīī bilaŋgaaliibi kpiliu. Nlan.

²Unimbɔti ń yīkì u-nannanliibi ń yàl̄, bin ná-uee ń sāǹ u-nimbiin.

³Kii ŋŋminyiim nín wáŋkí puee, yàntī bí wāŋkì míǹ, kii kisikampiŋ nín dùntī ŋŋmin puee, míǹ ní an nàantí binikpitib Unimbɔti nimbiin.

⁴Ama ní deedeedambi bí mmɔnni, bi fàal̀ Unimbɔti nimbiin, ní ki bí dipɔɔpindin!

⁵Gāāmaan ilan kí tīī Unimbɔti, gāāmaan ilan kí nyɔ̄ŋkì u-yindi, cátímaan nsan kí tīī un kā u-janjatɔrɔkuu pu ki páaǹní atagbannee[79]. U-yindi di sá ti-Dindaan, nín̄ fàal̀maan u-nimbiin!

⁶Unimbɔti un di kóò u-circir kɔŋkooŋŋunee sá ataŋkpiibil baa nì un mɔ́tí bikpiipoobi puee ní.

⁷Unimbɔti di tìì un kaa cáá ubɔee kudicaŋu, ní ki tìì bisarkadambi mmɔn nì dibatɔl. Ama bin jáà nì Unimbɔtee kóò kitiŋkuliŋŋi pu ní.

⁸Unimbɔti, ŋyunti ŋun a nìn nyáń ki līntì a-nibul nyɔkɔpuee, ŋyunti ŋun a nìn dū a-ba ki bíl̀ kuteeu puee,

⁹kitiŋ nìn cīŋkì ní kutagbɔŋu cōotì[80] Unimbɔti un sá Siinaayi jool Nimbɔtiuee nimbiin, Unimbɔti un sá Isirayeel Nimbɔtiuee nimbiin.

¹⁰Unimbɔti, a nìn yāntì utaa nìn̄ tiŋan pu, a-nibul nìn gīī ní a fātìi tīī-dì mpɔn.

¹¹A-tiŋki pu ní a-nib kāl̀, a-ŋanti poonee, Unimbɔti, a bɔ́ntì mpaan gbanti ki tīī bifalaadambi.

¹²Ti-Dindaan tīī mara, ní binimpoobi bin sòoǹ tibɔmɔntiilee dūu ŋá dikitikpaandi.

¹³Bibɔtiibi nì bi-janjakitiŋi sáǹ sáǹ, ní binimpoobi bin kíǹ mmɔŋkee yākatì tin bi sáǹ ki fée.

¹⁴Ni dáá gbíntìi dɔ̄ kunaabakaunaaa? Animbil kúti náká náká dibeenanjil feeŋyi pu, ní sindaariyasoon náká náká di-kuti pu.

¹⁵Ŋyunti ŋun Unimbɔti Mpɔŋkɔdaan nìn bíi jì ki yàantí bibɔtiibee, ntaayim nìn bíi lítí Saalmɔn jool pu.

¹⁶Baasan jool sá Unimbɔti jool ní, Baasan jool sá dijool din cáá yilpu kúnti kunti wīikée.

¹⁷Kin ba pu ní sii, dijool din cáá yilpu kúnti kunti wīikée ŋáań dijool din Unimbɔti lēē kí nīn kóò di-puee ipoompoon? Tiŋman, Unimbɔti làá nīn kóò niin ní talku.

¹⁸Unimbɔti cáá janjatɔrɔkub kutukub kutukub cutimaanyi. Ti-Dindaan bí bi-kansikin, Siinaayi jool din bí circir laŋkee pu.

¹⁹Ti-Dindaan Unimbɔti, a jɔ́m̀ yilpu niin kí nīn kóò. A cúú binib bi kíǹ ki sá bisarkadambi. Binib cáań-si tiwampɔkaal, ki kpáaǹ bin kaa tɔ́-see.

²⁰Tí jāam̀ ti-Dindaan ŋwiin kamaa! U sá Unimbɔti ti-fiiliu un tūntí ti-gìŋ́ŋi ki tìì-tee ní.

²¹Ti-Nimbɔtiu sá Unimbɔti un fìil̄ee ní. Úǹ ti-Dindaan Unimbɔti di cáá mpɔn kí fīī-ti kí nyāntí ŋkúmin.

²²Ama Unimbɔti làá wìil̀ u-nannanliibi yiliŋ, nì bin tú tiyikpifɔkɔl ki sá binikpɔliibee yaŋ.

²³Ti-Dindaan bí yii: «M làá yòon̄ní-bi Baasan jool pu kí gíiǹní, m làá nyāntí-bi dimɔɔl taapu kí gíiǹní,

²⁴án nín làá ŋá pu á còom̀ fatiku poon, ní a-booi ń ŋmɔ́ a-nannanliibi nantee.»

²⁵Unimbɔti, ti ká binib nín còom̄ ki pàkà-si puee. M-Nimbɔtiu, m-bɔtiu bi còom̄ ki kóò a-kɔŋkooŋŋun.

²⁶Bilaŋgaaliibi līī, ní biwambɔɔliibi lúŋkì, ní bisapɔmbi bí kansikin ki cákafí cancakantib.

²⁷Ní jāam̀maan Unimbɔti ni-kooŋyi poon, nimbi bin nyeeŋu sá Isirayeelee, ní jāam̀ ti-Dindaan.

²⁸Upeepeekaa di sá Beenjameen, ujipɔnjoolkaa naakooku, ní Juuda bɔtibiliŋ ŋin pēē abɔkuti ŋin bi gbáńee ń páań, ní Sabulɔn nì Neefitalii bɔtibiliŋ ń lūŋkì.

²⁹Unimbɔti, dàkà a-pɔŋŋu, Unimbɔti, dàkà a-baatandi, sii un di túń atuŋkpaan ki tīī-tee.

³⁰A-diiku kun bí Jeerusaleemee puee, bibɔtiibi làá dāá cáań-si bi-wampɔkaati.

³¹Kpàtī tikatin waŋkuluku pu, inajaa nacaŋkpuŋku pu, kí kpáaǹ anibul ŋin bí kii anabil nee pu. Bi gbàantí ki tìì-si animbil kúti. Gbá kí yàaǹ anibul ŋin néeń kujaau nee.

³²Bikàliŋkpaambi nyánní Eejipiti ki dɔ́miń, Eetiiyoopii yab tāntì bi-ŋalii ki túĺ Unimbɔti watil pú.

³³Kitiŋ pu beeŋi, gāāmaan ilan kí nyɔ̄ŋkì Unimbɔti, nyɔ̄ŋkìmaan ti-Dindaan

³⁴un jàkāń doooo cannaaku tagbɔŋku yilpuee. Pīlifìmaan, u tátiń mpɔmpɔn.

³⁵Sòom̀maan Unimbɔti pɔŋŋu pu. U jīǹ Isirayeel pu dibeel, ní u-pɔŋŋu bí atagbanni.

³⁶Unimbɔti, a cáá tifaandi a-circir kɔŋkooŋŋun. An sá Isirayeel Nimbɔtiu di tìì u-nibul dikpabil nì mpɔn. Tí nyɔ̄ŋkì Unimbɔti!