Read Ntcham Psaumes 69 Bible Online

Psaumes 69 - Ntcham bible

Psaumes 69

¹Daafiidi di ŋmàn̄ nlan nee ki tīī bilaŋgaaliibi kpiliu. Bi bɔ̀ɔ́ tibati ní ki gà-ŋu.

²Unimbɔti, fīī-mi, nnyim jɔ́m̀ ki sāā m-neen.

³M nín sìntī tikpatin taapu taapu, ní m-taaŋi kaa gbèetī kitiŋ. M bí nnyim min nyóòyee poon, ní nnyinjil bíi yòontí-mi.

⁴M gbáń ibiil ki tin gīī, m-neen séeb́. M nín kā ki kpèé a-saŋŋu pú puee yāntì m-nimbiliŋ gīī.

⁵Bin pée ná-mi fámee[81] wīikí ki jítiǹ m-yil pu yikpiti. M-nannanliibi tūntí-mi abɔgabil, ní bi lafun cáá mpɔn kí nàan̄-mi. Tin maa yùn̄ee ní bí bí yii ḿ nyàab̀ kí téeǹ.

⁶Unimbɔti, a nyí m-gbaandi pu, ní m-yìntitam kaa lìkī a-cee.

⁷Ti-Dindaan Unimbɔti Mpɔŋkɔdaan, taa yàntī man puee, icoo ń cúú bin máká a-puee. Isirayeel Nimbɔtiu, taa yàntī man puee, bí sìì bin nyàab̀-see.

⁸Di sá yii sii pu ní bi sìí-mi, ní m-yil tīī kaa yáatí.

⁹M kpántì m-nabiyaamu cee unicaan, ní man nì bin pēē dinabiilee kaa ti nyí-mi.

¹⁰Dineendi din m cáá a-diiku puee fòol̄ m-pɔbilin lìblib kii ŋŋmee. Asiibil ŋin bi sìí-see fàtīi gítiń man pu ní[82].

¹¹M súń ki bóob́ kinyɔkɔ, ama ní binib sìí-mi.

¹²M dū kutuku ki pēeǹ kí dàkà m-nimbaaku, ní m-bɔti kpántì nlan bi gà.

¹³Kpacantib puɔɔɔ, man bɔti ní bi sòoǹ, áli gba bidanyɔgbiliibi gà-mi ilan.

¹⁴Ama mamee, sii ti-Dindaan ní m bíi mèé, ŋyunti nee ní a máaǹ kí pīlifiǹ-mi. Unimbɔti, a-ŋanti wīikí tikpil, kíí-mi, di sá yii sii di sá difiil tiŋman pu.

¹⁵Nyāntí-mi tikpati nee poon ḿ taa múĺ. Nyāntí-mi bin ná-mee ŋaan, nì mbúun nee poon.

¹⁶Taa yàntī nnyinjil nee ń yòon̄-maaa, mbúun nee ń dū-mi kí náĺaaa, dikaakul nee mun ń dūú bìin̄ m-pu.

¹⁷Ti-Dindaan kíí-mi, di sá yii a-neeŋkpaandi ŋān̄. A-poommɔŋŋu puee, fàtī a-ba kí túĺ-mi.

¹⁸Taa fàtī a-boon kí tīī man a-tɔntɔnliu. M bí dinimbinaamandin, kíí-mi malaa.

¹⁹Sútí kí pìl̄-mi kí fīī-mi. M-nannanliibi puee, fīī-mi.

²⁰A nyí bi nín sìí-mee, a nyí m-cooi nì bi nín sòoǹ ki bíiĺ-mi puee, a nyí m-nannanliibi kɔkɔ.

²¹Asiibil bíil̀ m-pɔbil ní m dūu kpántì ubunli. M bàà cí ubɔ ń sɔ̄ m-saai, ama báà ubɔ kaa dɔ́miń. M bàà nyàab̀ ubɔ ń ŋméeǹ-mi kaa ká.

²²Bi dū ndabiim ki ŋá m-jinti poon, ní nnyinnyoo yaa cáá-mee, bi tìì-mi ndaam min gàm̀ee[83].

²³Bi-jiŋaalib jinti ń kpántí-bi kutaliŋŋu, ní kí kpántí bin bi yíińee kpaalaa!

²⁴Bi-nimbiliŋ ń jɔ̀b̄ kí taa ti nín̄ wāĺ. Bí nīn pée bōō baabadal[84].

²⁵Kpáatí a-bum kí sìtī bi-pu, kí yàntī a-ŋuul ń jà kí cúú-bi.

²⁶Bi-kɔŋkooŋyi ń kpántí adigbun ubɔ ń taa ti kɔ́ bi-diiŋŋin[85],

²⁷kun puee bi sāaǹ un tafal a dáaĺee, ní ki sòoǹ bin a tīī tiweendee falaau pu.

²⁸Gíiǹ bi-kpitii kɔkɔ kí túń-bi, taa pée dūú pɔ̄-bi.

²⁹Pítí bi-yiŋŋi binifoobi gbɔŋkun[86], taa kàaǹ-bi kí kūtì deedeedambi pu.

³⁰Ama mamee m sá unandaan ki bíi jīǹ falaa, a-jòońdi làá wúń m-pu, Unimbɔti.

³¹M làá gāā nlan kí nyɔ̄ŋkì-si, ní kí jāam̀-si kí lì yii a sá ukpaan.

³²Tíǹ fáatiǹ sii, ti-Dindaan ki jítiǹ unaa, ki jítiǹ unaja nì iyin nì titafuŋfukul.

³³Bin sīntiǹ bi-ba taapuee làá ká míǹ ní kí nīn fàal̀. «Nimbi bin nyàab̀ Unimbɔtee, nimbi di yì mmaŋfafɔkɔn!

³⁴Di sá yii ti-Dindaan pílifíǹ bifalaadambi, waa féeń u-yab, ŋyunti ŋun bi yaa bí sarkanee.

³⁵Kutagbɔŋu nì kitiŋ, nyɔ̄ŋkìmaan-u, ki kpáaǹ tiŋkub nì tin kɔkɔ bí bi-poonee.

³⁶Di sá Unimbɔti làá fīī Siiyɔn jool, ní kí fàtīí mā Juuda timmu. U-nib làá dāá fōō-mu kí nīn kíǹ ki kóò.

³⁷U-tɔntɔnliibi biyaamu làá dāá fōō-mu difakal, ní bin kɔkɔ néeń ti-Dindaanee ń dāá nīn kóò niin.»